Молитва святому Стилиану Пафлагонскому
«О священная главо, преподобне отче Стилиане! Подвигом добрым подвизався на земли, на небесех восприял еси венец правды от Христа Бога нашего. Темже на твой святый образ взирающе, о преславнем скончании жительства твоего радуемся и чтим святую память твою. Почитающе же твое велие дерзновение пред Господем, со смирением молим тя, преподобне отче: воззри убо благосердым оком любве твоея на нас, недостойных рабов твоих, и потщися богоприятным твоим ходатайством испросити у Царя царствующих и Господа господствующих, да пробавит великия и богатыя милости Своя на нас, грешных, да подаст нам дух правыя веры, дух любве, мира и радости о Дусе Святе, да избавит ны от всяких бед и напастей, да ниспослет вся полезная ко спасению душ наших. Ей, святче Божий, не посрами упования нашего, еже на тя по Бозе и Богородице возлагаем, но буди нам помощник и покровитель во спасение, да сподобимся скончати житие наше в покаянии и восприимем вечная благая во Царствии Христа Бога нашего, и прославим человеколюбие Отца и Сына и Святого Духа, и твое святое заступление, ныне и присно и во веки веков. Аминь.»
@Κύριεἐλέησον.με
Предназначен для келейного чтения.
Кондак 1
Избранный чудотворче и угодниче Христов, скорый помощниче и молитвенниче наш, преподобне отче Стилиане, прославляя прославльшаго тя Господа, похвальная пения приносим ти, чтущии святую память твою. Ты же, предстоя пред Престолом Вседержителя, воздвигни о нас, грешных, многомощныя молитвы твоя, взывающих ти:
Радуйся, преподобне отче Стилиане, преславный чудотворче.
Икос 1
Ангелов Творец и всея твари Создатель еще от утробы матерния избра тя, преподобне Стилиане, чудным житием своим на земли прославляти Троицу Святую, по блаженней же кончине твоей учини тя со святыми Ангелы воспевати Ему песнь сладчайшую на небеси. Мы же, таковому Божию благоволению о тебе радуяся, песнословим тя:
Радуйся, Святыя Церкви похвало. Радуйся, Пафлагонии крепкий столпе. Радуйся, добраго воспитания цвете благоуханный. Радуйся, Божественнаго избрания сосуде благословенный. Радуйся, Господа от юности возлюбивый. Радуйся, веру и любовь в сердце своем возрастивый. Радуйся, целомудрие души своея сохранивый. Радуйся, смирение великое стяжавый. Радуйся, пустыни великий молитвенниче. Радуйся, благодатный иноков путевождю и наставниче.
Радуйся, преподобне отче Стилиане, преславный чудотворче.
Кондак 2
Видя чистоту сердца твого, отче Стилиане, Всевидец Господь исполни душу твою благодати Своея и освяти ю в сосуд Духа Святаго, да видящии тя восхвалят Бога Вседержителя и, вземши на рамо кийждо крест свой, во след Ему грядет, воспевая: Аллилуиа.
Икос 2
Разумом, просвещенным от Господа, исполнен быв, преподобне, не попустил еси страстем в души твоей воцаритися, силою Божиею вся хитрости тленнаго и временнаго жития отражая. Темже, усердие твое похваляюще, вопием ти:
Радуйся, земли Пафлагонския похвало. Радуйся, Церкви Христовы зерцало. Радуйся, на земли, яко на небеси поживый. Радуйся, невозвратно за Господом последовавый. Радуйся, молитвы, поста и воздержания хранителю. Радуйся, истиннаго богопочитания насадителю. Радуйся, смирением мир души своея стяжавый. Радуйся, тленная и временная мира сего презревый. Радуйся, от Господа дар чудотворения получивый. Радуйся, врага злокозненнаго низложивый.
Радуйся, преподобне отче Стилиане, преславный чудотворче.
Кондак 3
Силою Божественныя любве, еюже исполнено бысть сердце твое, укрепляемый, святе Стилиане, вся имения твоя нищей братии раздал еси и, ко братии иночестей сопричтенный, сладце воспевал еси Богу: Аллилуиа.
Икос 3
Имея в сердце своем желание велие к непрестанному восхождению лествицею духовною и уединение возлюбив, братию свою оставил еси, подвижниче многотрудный, и в пещеру преселився, дни и нощи в славословии Бога пребывал еси. Таковому твоему дерзновению дивящеся, восхваляем тя:
Радуйся, Господа всем сердцем возлюбивый. Радуйся, Царствия Небеснаго взыскавый. Радуйся, мудре ко спасению стопы своя направивый. Радуйся, Бога добродетельным житием прославивый. Радуйся, великих дарований вместилише. Радуйся, трезвения и воздержания хранилище. Радуйся, яко житию безплотных поревновал еси. Радуйся, яко подвигом древних отцев пустынножителей подражал еси. Радуйся, Божественною благодатию сердца молящихся тебе напаяяй. Радуйся, благодатныя исцеления детем малым источаяй.
Радуйся, преподобне отче Стилиане, преславный чудотворче.
Кондак 4
Бурю помыслов и страстей безбедно претерпел еси, отче преподобне, и пристанище тихое Христа обрел еси, Емуже во мнозе долготерпении неленостно работая воспевал еси: Аллилуиа.
Икос 4
Слышавше о богоугоднем житии твоем, отче Стилиане, многия страждущия и немощныя к пещере твоей прихождаху и, наставлением твоим внимая, в истинней вере укрепляхуся, в печалех утешение обретаху и во гресех слезное покаяние приношаху. Сего ради ублажаем тя:
Радуйся, светильниче присногорящий, путь спасения освещаяй. Радуйся, крине пустынный, святостию благоухаяй. Радуйся, рабе Господень, благий и верный. Радуйся, небесными даровании обогащенный. Радуйся, яко пред Престолом Царя Небеснаго предстоиши. Радуйся, яко Богу молитвы о нас приносиши. Радуйся, Господа кроткий и смиренный служителю. Радуйся, заповедей Божиих ревностный исполнителю. Радуйся, яко милосердие Отца Небеснаго к нам приклоняеши. Радуйся, яко любовию к Богу сердца наша исполняеши.
Радуйся, преподобне отче Стилиане, преславный чудотворче.
Кондак 5
Боготечней звезде уподобился еси, преподобне отче, светом благочестиваго жития твоего пустыню освящая и вся приходящия к тебе учением Христовым просвещая и веровати во Единаго истиннаго Бога научая, да купно с тобою воспевают: Аллилуиа.
Икос 5
Видевше, яко чада малыя незлобиви суть, и словесем Евангельским внимая: «Аминь глаголю вам, аще не обратитеся и будете яко дети, не внидете в Царство Небесное», веру таковую стяжал еси, преподобне отче, и благодать от Господа молитися о чадех восприял еси. Мы же, воспевая величия Божия, на тебе явленная, глаголем ти сице:
Радуйся, младенцев благостный попечителю. Радуйся, матерей болезнующих о чадех своих утешителю. Радуйся, возложением рук немощи младенцев исцелявый. Радуйся, веру чистую и искреннюю в себе стяжавый. Радуйся, яко чадом малым покровительствуеши. Радуйся, яко за безчадных родителей о даровании им чад Бога умоляеши. Радуйся, душевныя и телесныя недуги исцеляяй. Радуйся, ко благочестивому житию побуждаяй. Радуйся, теплый наш молитвенниче. Радуйся, милостивый наш заступниче.
Радуйся, преподобне отче Стилиане, преславный чудотворче.
Кондак 6
Проповедником евангельския кротости был еси, преподобне отче, образом жития твоего всем показуя, яко вся возможна человеку о укрепляющем Бозе, Егоже благодатию и наша сердца во истинней вере укрепи и буди нам скорый помощник и теплый молитвенник, вопиющим о тебе Богу: Аллилуиа.
Икос 6
Возсиял еси яко светильник, на свещнице церковней поставленный, святе Стилиане, да вси видящии многая чудеса исцелений тобою творимая и присно являемая, восхвалят Бога, дивнаго во святых Своих, тебе же воспоют сицевая:
Радуйся, равноангельный слуго Господень. Радуйся, обиталище Духа Святаго. Радуйся, благочестием себе украсивый. Радуйся, в сосуд благоуханный душу твою обративый. Радуйся, яко на земли имя твое прославляется. Радуйся, яко сладостию небесною наслаждаешися. Радуйся, жажду духовную утоливый. Радуйся, на небесех обитель себе сотворивый. Радуйся, яко со Ангелы Господа воспеваеши. Радуйся, яко в лице преподобных пребываеши.
Радуйся, преподобне отче Стилиане, преславный чудотворче.
Кондак 7
Хотя явити миру новаго источника милости Своея неоскудевающия, Христе Боже наш, даровал еси нам предстателя и молитвенника к Тебе дерзновеннаго — преподобнаго Стилиана, да Тя, Всеблагаго Бога нашего славяще, во умилении сердечнем зовем: Аллилуиа.
Икос 7
Новаго ходатая и заступника имамы тя пред Богом, блаженне Стилиане, ты бо душею кроткою и милостивою непрестанно молишися Господеви, о еже ниспослати благодатную помощь всем людем, славящим Его, Всеблагаго Отца нашего Небеснаго, и вопиющим ти сице:
Радуйся, ароматы райскими благоухаяй. Радуйся, неисчерпаемый источниче исцелений. Радуйся, усердный о нас молитвенниче. Радуйся, обидимых крепкий заступниче. Радуйся, добродетельнаго жития учителю. Радуйся, немощных искусный целителю. Радуйся, в любви к Богу пламеневый. Радуйся, небесных благ возжелевый. Радуйся, праведности нас научаяй. Радуйся, любити Бога и ближняго своего нас наставляяй.
Радуйся, преподобне отче Стилиане, преславный чудотворче.
Кондак 8
Странника и пришельца помышлял еси себе быти в мире сем, преблаженне отче, отечествия горняго взыскуя и Небеснаго Иерусалима гражданином быти желая, в немже ныне сладце воспеваеши Богу песнь: Аллилуиа.
Икос 8
Весь распалился еси любовию к Сладчайшему Иисусу, преподобне отче, дни и нощи в молитве и подвигах пребывая и, Духа Святаго исполнився, всему миру молитвенник изряден показался еси, реки чудес источаяй. Сего ради, почитая святую память твою, во умилении зовем:
Радуйся, на помощь тя призывающих спасаяй. Радуйся, недужных и страждущих исцеляяй. Радуйся, вражиих стрел прогонителю. Радуйся, диавольских наветов разорителю. Радуйся, яко Ангелы труды твоими возвеселил еси. Радуйся, яко диавола подвигами твоими посрамил еси. Радуйся, непоколебимый столпе иночествующих. Радуйся, милостивый покровителю в супружестве живущих. Радуйся, присный о нас к Богу молитвенниче. Радуйся, в бедах скорый наш заступниче.
Радуйся, преподобне отче Стилиане, преславный чудотворче.
Кондак 9
Всякое естество удивил еси, предивне отче, единаго бо Бога возлюбив, в пустыни взыскал еси Того равноангельным житием твоим, ныне же на небесех блаженства райскаго наслаждаешися и воспеваеши Пресвятей Троице: Аллилуиа.
Икос 9
Ветия многовещанныя не могут по достоянию воспети вся подвиги и труды твоя, преподобне отче, во славу Господа тобою творимыя. Мы же, душами умиляяся, богоугодное житие твое восхваляем пении таковыми:
Радуйся, истинному служению Богу нас научаяй. Радуйся, сердца наша радости исполняяй. Радуйся, яко безропотному несению креста нас научаеши. Радуйся, яко недуги наша душевныя и телесныя исцеляеши. Радуйся, благочестия водами жаждущия спасения напоивый. Радуйся, светом Богопознания верныя просветивый. Радуйся, во бранех со страстьми помощниче. Радуйся, младенцев от недугов защитниче. Радуйся, лампадо любве неугасимая. Радуйся, лествице на небеса возводящая.
Радуйся, преподобне отче Стилиане, преславный чудотворче.
Кондак 10
Спастися хотящии от различных напастей, бед и скорбей, тебе, преподобне отче, предстателя крепкаго и поборника непостыднаго имеют: приял бо еси от Бога благодать во всяких бедах заступати призывающия на помощь имя твое, да молитвами твоими ограждаеми, благодарно воспеваем о тебе Спасителю нашему: Аллилуиа.
Икос 10
Стена твердая и ограждение крепкое явился еси миру, преподобне отче Стилиане, ходатайством бо твоим Церковь Святая укрепляется, мир водворяется и вся во благо устрояется. Сего ради приими от нас сицевая:
Радуйся, от пагубных ересей отвращаяй. Радуйся, очи наша душевныя просвещаяй. Радуйся, яко благодатию Божиею сердца наша укрепляеши. Радуйся, яко о прощении грехов наших Господа умоляеши. Радуйся, спасению душ наших пособствуяй. Радуйся, на путь праведный нас направляяй. Радуйся, от козней вражиих защитниче. Радуйся, на Страшнем Суде заступниче. Радуйся, щедрот Божиих милостивый подателю. Радуйся, у Престола Вседержителя предстателю.
Радуйся, преподобне отче Стилиане, преславный чудотворче.
Кондак 11
Песнь хвалебную приносим ти, преблаженне отче, почитающии святую память твою, ты же усердно моли Святую Троицу о еже избавитися нам от падений греховных и жизнь вечную наследовати, да непрестанно зовем Богу: Аллилуиа.
Икос 11
Светозарный светильник, от Истиннаго Света озаряемый, сущим на земли являешися, преподобне отче Стилиане, сердца бо верных просвещаеши и к разуму Божественному вся наставляеши, да со умилением зовут ти сицевая:
Радуйся, на земли яко Ангел поживый. Радуйся, на небеси со святыми пребываяй. Радуйся, Господу житием своим угодивый. Радуйся, последователем стопам Его себе показавый. Радуйся, яко венец безсмертия от Бога приял еси. Радуйся, яко райское блаженство со святыми унаследовал еси. Радуйся, во бдении пребывати нас наставляяй. Радуйся, молитвенно нас покрываяй. Радуйся, в тяжких обстояниих наш помощниче. Радуйся, сирых и немощных заступниче.
Радуйся, преподобне отче Стилиане, преславный чудотворче.
Кондак 12
Благодать данную ти от Господа вемы, преподобне отче, во еже не токмо недужныя младенцы исцеляти и заступником и покровителем им быти, обаче и всему христианскому роду милости своя низпосылати; веруем, яко и по смерти вся сия твориши всем, с верою к чудотворным иконам твоим припадающим, Богу же о тебе вопиющим: Аллилуиа.
Икос 12
Поюще славное житие твое и о блаженнем отшествии твоем на небеса радующеся, пречудне отче Стилиане, ублажаем тя, яко угодника Божия и дивнаго чудотворца. Ты же, Богу предстоя, присно поминай нас, совершающих любовию память твою и со умилением зовущих ти таковая:
Радуйся, житие твое благочестиво скончавый. Радуйся, в радость Господа твоего вшедый. Радуйся, Горняго Иерусалима честнейший гражданине. Радуйся, райских обителей достойный обитателю. Радуйся, чтущих тя благодатный наставниче. Радуйся, притекающих к тебе благостный покровителю. Радуйся, младенцев целителю. Радуйся, юных наставниче. Радуйся, всех призывающих тя милуяй и питаяй. Радуйся, и по кончине твоей исцеления обильно источаяй.
Радуйся, преподобне отче Стилиане, преславный чудотворче.
Кондак 13
О всехвальный и предивный угодниче Христов, преподобне отче Стилиане! Приими сие малое моление, от усердия нашего в похвалу тебе приносимое, и покрый молитвами твоими всех притекающих к тебе с верою и любовию, да покаяние наше приимше, Господь и Бог наш простит нам вся грехи наша и сопричастники Царствия Своего соделает, да выну с тобою и со всеми святыми воспеваем Ему: Аллилуиа.
Се́й конда́къ глаго́лется три́жды. Та́же Икосъ 1-й и Конда́къ 1-й
Молитва
О священная главо, преподобне отче Стилиане! Подвигом добрым подвизався на земли, на небесех восприял еси венец правды от Христа Бога нашего. Темже на твой святый образ взирающе, о преславнем скончании жительства твоего радуемся и чтим святую память твою. Почитающе же твое велие дерзновение пред Господем, со смирением молим тя, преподобне отче: воззри убо благосердым оком любве твоея на нас, недостойных рабов твоих, и потщися богоприятным твоим ходатайством испросити у Царя царствующих и Господа господствующих, да пробавит великия и богатыя милости Своя на нас, грешных, да подаст нам дух правыя веры, дух любве, мира и радости о Дусе Святе, да избавит ны от всяких бед и напастей, да ниспослет вся полезная ко спасению душ наших. Ей, святче Божий, не посрами упования нашего, еже на тя по Бозе и Богородице возлагаем, но буди нам помощник и покровитель во спасение, да сподобимся скончати житие наше в покаянии и восприимем вечная благая во Царствии Христа Бога нашего, и прославим человеколюбие Отца и Сына и Святого Духа, и твое святое заступление, ныне и присно и во веки веков. Аминь.
Тропарь, глас 3
Столп воодушевленный воздержания, столп неколебимый Церкве, Стилиане, соделался еси, блаженне. Господу от юности вверился еси, обиталище Духа явился еси, отче преподобне, Христа Бога моли даровати нам велию милость.
Кондак, глас 4
От утробы матерния освятивыйся, яко Божественный Самуил, богоносне, подвижнически Христа Бога прославил еси. Темже исцелений показался еси кладязь и предстатель божественный отроков и младенцев, Христос бо тя светло славит, Егоже измлада, Стилиане, прославил еси.
Порядок чтения Акафистов
Молитвами святых отец наших, Господи Иисусе Христе, Сыне Божий, помилуй нас. Аминь.
Святый Боже, Святый Крепкий, Святый Безсмертный, помилуй нас (трижды, с крестным знамением и поясными поклонами).
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас. Господи, очисти грехи наша. Владыко, прости беззакония наша. Святый, посети и исцели немощи наша, имене Твоего ради.
Господи, помилуй (трижды).
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех. Да святится имя Твое. Да приидет царствие Твое. Да будет воля Твоя, яко на Небеси и на земли. Хлеб наш насущный даждь нам днесь. И остави нам долги наша, яко же и мы оставляем должником нашим, и не введи нас во искушение, но избави нас от лукаваго.
Господи, помилуй (12 раз).
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу (поклон).
Приидите, поклонимся и припадем Христу Цареви нашему Богу (поклон).
Приидите, поклонимся и припадем к Самому Христу, Цареви и Богу нашему (поклон).
Псалом 50.
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззакония моя аз знаю и грех мой предо мною есть выну. Тебе Единому согреших, и лукавая пред Тобою сотворих, яко да оправдишися во словесех Твоих и победиши, внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твой. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая, тогда возложат на олтарь Твой тельцы.
Символ веры
Верую во Единаго Бога Отца, Вседержителя, Творца небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, Иже от Отца рожденнаго прежде всех век; Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И восшедшаго на небеса, и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа, Животворящего, Иже от Отца исходящаго, Иже со Отцем и Сыном спокланяема и сславима, глаголавшаго пророки. Во едину Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых, и жизни будущаго века. Аминь.
