Акафист, тропарь, молитва святому мученику Трифону. Обсуждение на LiveInternet

Тропарь, глас 4*

Му́ченик Твой, Го́споди, Три́фон/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Перевод: Мученик Твой, Господи, Трифон подвигом своим венец нетленный получил от Тебя, Бога нашего; ибо он, имея силу Твою, мучителей низложил, сокрушил и демонов немощные дерзости. По молитвам его, Христе Боже, спаси души наши.

Акафист святому мученику Трифону

А҆ка́ѳїстъ ст҃о́мꙋ мꙋ́ченикꙋ трѵ́фѡнꙋ

Конда́къ а҃.

И҆збра́нный ѿ бг҃а и҆ къ ли̑кꙋ ст҃ы́хъ сопричте́нный, ст҃ы́й мч҃ниче трѵ́фѡне! Моли́сѧ ѡ҆ на́съ, грѣ́шныхъ, влⷣцѣ хрⷭ҇тꙋ̀ и҆ помога́й на́мъ побѣжда́ти мі́ръ, пло́ть и҆ дїа́вола, многоѻбра́знѡ вою́ющїѧ на ны̀, ꙗ҆́коже побѣди́лъ є҆сѝ и҆̀хъ бл҃года́тїю и҆ си́лою возлю́бленнагѡ тобо́ю хрⷭ҇та̀, да, и҆зба́вльшесѧ ѿ врагѡ́въ на́шихъ ви́димыхъ и҆ неви́димыхъ, бл҃года́рственнѡ воззове́мъ тѝ:

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

І҆́косъ а҃.

Ѡ҆́бразꙋ бл҃гоче́стїѧ роди́телей твои́хъ подража́ѧ, хрⷭ҇тїа̑нскїѧ нра́вы ѿ лѣ́тъ ма́лыхъ прїѧ́лъ є҆сѝ, ст҃ы́й мч҃ниче, и҆ ма́лъ сы́й лѣ̑ты, ста́ръ же ра́зꙋмомъ, вои́стиннꙋ хрⷭ҇тїа́нинъ соверше́нъ ꙗ҆ви́лсѧ є҆сѝ. Мы́ же, воспомина́юще добродѣ́тельное житїѐ твоѐ, восхвалѧ́емъ тѧ̀ си́це:

Ра́дꙋйсѧ, добронра́вныхъ роди́телей бл҃гочести́вый сы́не: ра́дꙋйсѧ, вели́кое и҆̀хъ ᲂу҆тѣше́нїе.

Ра́дꙋйсѧ, а҆́гг҃ла твоегѡ̀ храни́телѧ непреста́нное весе́лїе: ра́дꙋйсѧ ѿ ю҆́ности твоеѧ̀ всегѡ̀ себє̀ бг҃ꙋ преда́вый.

Ра́дꙋйсѧ, ѿ ю҆́ности хрⷭ҇та̀ возлюби́вый: ра́дꙋйсѧ ѿ ма́лыхъ лѣ́тъ бл҃года́ть бж҃їю ѻ҆би́льнѡ стѧжа́вый.

Ра́дꙋйсѧ, дꙋ́шꙋ свою̀ непоро́чнꙋ ꙗ҆ви́вый: ра́дꙋйсѧ себє̀ самагѡ̀ въ хра́мъ дх҃а ст҃а́гѡ ᲂу҆гото́вавый.

Ра́дꙋйсѧ, ѻ҆́трокомъ ѻ҆́бразъ житїѧ̀ ст҃а́гѡ показа́вый: ра́дꙋйсѧ бл҃гоче́стїемъ твои́мъ вѣ̑рныѧ возвеселѧ́ѧй: ра́дꙋйсѧ ѿ ма́лыхъ лѣ́тъ за всѧ̑ сїѧ̑ бг҃омъ возлю́бленный.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ в҃.

Ви́дѧ гдⷭ҇ь, ꙗ҆́кѡ во́лею по стезѝ бл҃гоче́стїѧ, въ не́мже ѿ роди́телей твои́хъ наста́вленъ бы́лъ є҆сѝ, тече́ши, и҆ ꙗ҆́кѡ вои́стиннꙋ лю́биши бг҃а, сотвори́ тѧ въ жили́ще ст҃а́гѡ дх҃а ѿ лѣ́тъ ма́лыхъ и҆ ѿве́рзе ᲂу҆ста̀ твоѧ̑ пѣ́ти є҆мꙋ̀: А҆ллилꙋ́їа.

І҆́косъ в҃.

Си́лꙋ вѣ́ры твоеѧ̀ показꙋ́ѧ, влⷣка хрⷭ҇то́съ дарова̀ тебѣ̀, ст҃ы́й мꙋ́чениче, є҆щѐ ѻ҆́трокꙋ бы́вшꙋ, да́ръ чꙋдотворе́нїй. Сегѡ̀ ра́ди вопїе́мъ тѝ:

Ра́дꙋйсѧ, ѿ ма́лыхъ лѣ́тъ соверше́ннꙋю любо́вь къ бг҃ꙋ показа́вый: ра́дꙋйсѧ за́повѣдей є҆гѡ̀ не то́кмѡ слы́шатель, но и҆ дѣ́латель ѿ младе́нчества бы́вый.

Ра́дꙋйсѧ, ѿ ю҆́ности твоеѧ̀ добродѣ́тєли хрⷭ҇тїа̑нскїѧ стѧжа́вый: ра́дꙋйсѧ ѿ ма́лыхъ лѣ́тъ житїе́мъ, вѣ́рою и҆ любо́вїю твое́ю бг҃ꙋ ᲂу҆годи́вый.

Ра́дꙋйсѧ, да́ръ и҆сцѣле́нїй ѿ негѡ̀ прїѧ́вый: ра́дꙋйсѧ да́ръ то́й на по́льзꙋ бли̑жнимъ и҆ждива́ющїй.

Ра́дꙋйсѧ, многоразли̑чныѧ болѣ̑зни и҆сцѣлѧ́ющїй: ра́дꙋйсѧ въ недꙋ́зѣхъ ѡ҆блегче́нїе да́рꙋющїй.

Ра́дꙋйсѧ, страда̑нїѧ въ ра́дость ѡ҆браща́ющїй: ра́дꙋйсѧ и҆сцѣлє́нїѧ сїѧ̑ во сла́вꙋ бж҃їю соверша́ющїй.

Ра́дꙋйсѧ, тѣ́ми и҆́стинꙋ вѣ́ры правосла́вныѧ показꙋ́ющїй: ра́дꙋйсѧ тѣ́ми на́съ къ славосло́вїю бг҃а возбꙋжда́ющїй.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ г҃.

Вѣ́рою и҆ любо́вїю стѧжа́лъ є҆сѝ ѿ бг҃а вла́сть и҆згонѧ́ти дꙋ̑хи нечи̑стыѧ, мꙋ́чащїѧ человѣ́ки и҆ претѧ́щыѧ и҆̀мъ воспѣва́ти бг҃ꙋ: А҆ллилꙋ́їа.

І҆́косъ г҃.

Ви́дѧ дарова́ннꙋю тѝ, ст҃ы́й мꙋ́чениче, си́лꙋ бж҃їю, вспѧ́ть бѣжа́ша де́мони, и҆́миже ѡ҆держи́ми бѧ́хꙋ бѣснова́тїи лю́дїе. Ви́дѧщїи же сїѧ̑, воспѣва́хꙋ тѝ си́це:

Ра́дꙋйсѧ, ѿ бг҃а вла́сть на нечи̑стыѧ дꙋ̑хи прїѧ́вый: ра́дꙋйсѧ си́лою бж҃їею си́хъ и҆згонѧ́ющїй.

Ра́дꙋйсѧ, врагꙋ̀ чл҃вѣ́ческомꙋ вреди́ти лю́демъ возбранѧ́ющїй: ра́дꙋйсѧ кѡ́зни дїа́вола и҆ а҆́ггелѡвъ є҆гѡ̀ разрꙋша́ющїй.

Ра́дꙋйсѧ, си́лꙋ и҆́хъ низлага́ющїй: ра́дꙋйсѧ безси́лїе и҆́хъ ꙗ҆влѧ́ющїй.

Ра́дꙋйсѧ, стра́хомъ и҆ тре́петомъ и҆̀хъ поража́ющїй: ра́дꙋйсѧ вѣ́ры хрⷭ҇то́вы си́лꙋ показꙋ́ющїй.

Ра́дꙋйсѧ, вѣ́рныхъ къ прославле́нїю бг҃а воздвиза́ющїй: ра́дꙋйсѧ въ бѣда́хъ и҆ ско́рбѣхъ сꙋ́щихъ прибѣга́ти къ предста́тельствꙋ ст҃ы́хъ наставлѧ́ющїй.

Ра́дꙋйсѧ, въ нꙋ́ждахъ на́шихъ ѡ҆браща́тисѧ къ бг҃ꙋ наꙋча́ющїй: ра́дꙋйсѧ помо́щниче на́шъ, бг҃омъ на́мъ дарова́нный.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ д҃.

Восхотѣ́въ тобо́ю ѡ҆брати́ти ꙗ҆зы̑ки ѿ пꙋтѝ нече́стїѧ и҆ ѿкры́ти и҆̀мъ пꙋ́ть и҆́стинный, ведꙋ́щїй въ живо́тъ вѣ́чный, си́ є҆сть вѣ́рꙋ и҆́стиннꙋю, вѣ́рꙋ правосла́внꙋю, да́же до ри́ма и҆з̾ комѱа́ды приведе́ тѧ гдⷭ҇ь, да и҆ въ черто́гахъ ца́рскихъ проповѣ́си бг҃а и҆ та́мѡ мно́гїѧ наꙋчи́ши пѣ́ти є҆мꙋ̀: А҆ллилꙋ́їа.

І҆́косъ д҃.

Хотѧ́й ѡ҆брати́ти мно́гихъ на пꙋ́ть сп҃се́нїѧ, попꙋстѝ гдⷭ҇ь де́монꙋ всели́тисѧ въ дще́рь царе́вꙋ, и҆ же́стокѡ мꙋ́чити и҆ в̾верга́ти ю҆̀ многоча́стнѣ во ѻ҆́гнь и҆ во́дꙋ. Вра́чеве ничто́же ᲂу҆спѣва́хꙋ и҆ ничи́мже страда̑нїѧ дще́ри царе́вой ᲂу҆толи́ти возмого́ша. Є҆гда́ же и҆ си́льнїи мі́ра сегѡ̀ и҆ всѧ́кꙋю враче́бнꙋю хи́трость вѣ́дꙋщїи ничто́же возмого́ша и҆ и҆сповѣ́дахꙋ не́мощь свою̀, тогда̀ велѣ́нїемъ бж҃їимъ проглаго́ла дїа́волъ, ꙗ҆́кѡ є҆ди́нъ є҆́сть, и҆́же и҆згна́ти є҆го̀ и҆́мать, и҆ сѐ є҆́сть трѵ́фѡнъ. Тогда̀ приле́жнѡ и҆ска́хꙋ и҆ ѡ҆брѣто́ша є҆го̀ въ комѱа́дѣ. Грѧдꙋ́щꙋ же є҆мꙋ̀ и҆ є҆щѐ дале́че ѿ ри́ма сꙋ́щꙋ, возопѝ гла́сомъ ве́лїимъ дїа́волъ и҆ и҆зы́де, и҆ и҆сцѣлѣ̀ дѣви́ца. Ви́дѧщїи сїѧ̑ дивлѧ́хꙋсѧ и҆ глаго́лахꙋ:

Ра́дꙋйсѧ, трѵ́фѡне, є҆щѐ дале́че сꙋ́щїй въ бѣ́гство дїа́вола ѡ҆брати́вый: ра́дꙋйсѧ ꙗ҆́кѡ дїа́волъ безси́лїе пред̾ тобо́ю и҆сповѣ́да.

Ра́дꙋйсѧ, молѧ́щымсѧ тебѣ̀ ско́рый помо́щниче: ра́дꙋйсѧ недꙋ́гѡвъ си́лою бж҃їею цѣли́телю.

Ра́дꙋйсѧ, ѡ҆ста́вленныхъ врача́ми на своѝ рꙋ́цѣ прїе́млющїй: ра́дꙋйсѧ печа̑ли на ра́дость премѣнѧ́ющїй.

Ра́дꙋйсѧ, печа́льнымъ ᲂу҆тѣше́нїе и҆ скорбѧ́щымъ ра́дованїе посыла́ющїй.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ є҃.

Ви́дѣша вѣ́рнїи, и҆́же въ ри́мѣ, чꙋ́до, прише́ствїемъ твои́мъ бы́вшее, ᲂу҆крѣпи́шасѧ въ вѣ́рѣ свое́й и҆ воспѣ́ша бг҃ꙋ, побѣди́вшемꙋ а҆́дскагѡ ѕмі́ѧ и҆ да́рꙋющемꙋ вѣ́рꙋющымъ въ него̀ таковꙋ́ю си́лꙋ: А҆ллилꙋ́їа.

І҆́косъ є҃.

Оу҆вѣре́нїѧ и҆ща̀, тебє̀ прише́дшꙋ въ ри́мъ, ст҃ы́й трѵ́фѡне, ꙗ҆́кѡ ты̀ є҆сѝ то́й, є҆го́же ᲂу҆боѧ́сѧ де́монъ, молѝ тѧ̀ і҆мпера́торъ гордїа́нъ, да ꙗ҆ви́ши и҆ є҆мꙋ̀, и҆ сѷгклі́тꙋ є҆гѡ̀, и҆ лю́демъ въ чꙋ́вственномъ ви́дѣ дїа́вола, и҆ не ѿре́клсѧ є҆сѝ, но, возложи́въ на сѧ̀ по́стъ, помоли́сѧ гдⷭ҇ꙋ дні́й ше́сть. Въ де́нь же седмы́й, прише́дшымъ царю̀, сѷгклі́тꙋ и҆ лю́демъ, возопи́лъ є҆сѝ: тебѣ̀ глаго́лю, дꙋ́ше нечи́стый, во и҆́мѧ гдⷭ҇а моегѡ̀ і҆и҃са хрⷭ҇та̀ ꙗ҆ви́сѧ сѣ́мѡ и҆ покажѝ сво́й де́мѡнскїй ѻ҆́бразъ здѣ̀ сꙋ́щымъ, и҆ безси́лїе своѐ и҆сповѣ́ждь. И҆ бы́сть та́кѡ. И҆ зрѧ́хꙋ всѝ безѡбра́зїе де́монское и҆ дивлѧ́хꙋсѧ вѣ́рѣ ст҃а́гѡ, вопїю́ще:

Ра́дꙋйсѧ, трѵ́фѡне, є҆го́же де́мони ѡ҆слꙋ́шатисѧ не мо́гꙋтъ: ра́дꙋйсѧ трѵ́фѡне, по є҆гѡ́же велѣ́нїю дꙋ́си нечи́стїи въ тѣле́снѣмъ ви́дѣ ꙗ҆влѧ́ютсѧ.

Ра́дꙋйсѧ, трѵ́фѡне, си́лою бж҃їею повелѣ́вый дїа́волꙋ и҆сповѣ́дати, ꙗ҆́кѡ на хрⷭ҇тїа́ны, и҆́же ст҃ꙋ́ю правосла́внꙋю и҆ а҆пⷭ҇льскꙋю вѣ́рꙋ соде́ржатъ, вла́сти не и҆́мать: ра́дꙋйсѧ трѵ́фѡне, є҆мꙋ́же возвѣще́но бы́сть, ꙗ҆́кѡ де́мони вла́сть и҆́мꙋтъ мꙋ́чити то́кмѡ тѣ́хъ, и҆́же свои̑мъ похотє́мъ грѣхѡ́внымъ слѣ́дꙋютъ и҆ дѣла̀, ᲂу҆гѡ́днаѧ дїа́волꙋ, творѧ́тъ.

Ра́дꙋйсѧ, трѵ́фѡне, ꙗ҆́кѡ наꙋчи́лъ є҆сѝ на́съ бѣ́гати ꙗ҆зы́ческагѡ нече́стїѧ: ра́дꙋйсѧ трѵ́фѡне, ꙗ҆́кѡ наꙋча́еши всѣ́хъ бѣ́гати всѧ́каго грѣха̀, въ добродѣ́телѣхъ же подвиза́тисѧ.

Ра́дꙋйсѧ, вѣ́рꙋ правосла́внꙋю тве́рдѡ содержа́ти наставлѧ́ѧй на́съ: ра́дꙋйсѧ хотѧ́щымъ бл҃гоче́стнѡ жи́ти помога́ѧй.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ ѕ҃.

Ви́дѣвше, ка́кѡ мла́до ѻ҆троча̀ повелѣва́етъ вла́стнѡ дꙋховѡ́мъ ѕло́бы поднебє́снымъ, ᲂу҆боѧ́хꙋсѧ мно́зи, и҆ слы́шаще ѿ де́мѡна и҆ ви́дѧще воѻ́чїю, ꙗ҆ковꙋ̀ си́лꙋ и҆́мать вѣ́ра хрⷭ҇то́ва, ѡ҆брати́шасѧ къ бг҃ꙋ: нече́стїе же и҆ прѡ́чаѧ заблꙋждє́нїѧ своѧ̑ ѿло́жше, крⷭ҇ти́шасѧ, и҆ ᲂу҆сты̀ свои́ми ѿ се́рдца чи́ста бл҃года́рственнѡ воспѣ́ша бг҃ꙋ пѣ́снь: А҆ллилꙋ́їа.

І҆́косъ ѕ҃.

Бл҃годарѧ́ще тѧ̀, ца́рь вложѝ въ рꙋ́цѣ твоѝ, мꙋ́чениче, да̑ры и҆ зла́то, ты́ же, хрⷭ҇та̀ бг҃а прїѡбрѣты́й, ни во что́же вмѣни́лъ є҆сѝ всѧ̑, ꙗ҆̀же въ мі́рѣ се́мъ ꙗ҆́кѡ бла̑га почита́ютсѧ, и҆ прїѧ́лъ є҆сѝ да̑ры царе́вы, да послꙋ́жиши си́ми бли̑жнимъ твои̑мъ, и҆ ше́дъ во ѻ҆те́чество твоѐ комѱа́дꙋ, да́лъ є҆сѝ всѧ̑ ни́щымъ, си̑рымъ и҆ всѣ̑мъ въ нꙋ́ждѣ сꙋ́щымъ, непреста́ннѡ па́мѧтꙋѧ, ꙗ҆́кѡ расточи́въ бога́тство земно́е тлѣ́нное, собере́ши себѣ̀ на нб҃сѝ бога́тство нетлѣ́нное вѣ́чное. Мы́ же, наꙋча́емїи тобо́ю та́кожде твори́ти, вопїе́мъ тѝ си́це:

Ра́дꙋйсѧ, трѵ́фѡне, дꙋ́шꙋ свою̀ чꙋ́ждꙋ сребролю́бїѧ показа́вый: ра́дꙋйсѧ млⷭ҇рдїе дꙋшѝ твоеѧ̀ вы́нꙋ ꙗ҆влѧ́ѧй.

Ра́дꙋйсѧ, ни́щихъ пита́тель бы́вый: ра́дꙋйсѧ неимꙋ́щымъ сострада́нїе показа́вый.

Ра́дꙋйсѧ, за́повѣдь хрⷭ҇та̀ просѧ́щемꙋ ᲂу҆ тебє̀ да́й и҆спо́лнивый: ра́дꙋйсѧ и҆ на́съ и҆сполнѧ́ти за́пѡвѣди бж҃їи наꙋчи́вый.

Ра́дꙋйсѧ, ꙗ҆́коже ше́ствїемъ въ ри́мъ и҆ возвраще́нїемъ твои́мъ въ комѱа́дꙋ мно́гихъ ᲂу҆тѣ́шивый, ѡ҆бодри́вый и҆ возвесели́вый: ра́дꙋйсѧ показа́вый на́мъ ѡ҆́бразъ, ка́кѡ бога́тствомъ ги́бнꙋщимъ на землѝ неги́блющее бога́тство на нб҃сѝ собира́ти.

Ра́дꙋйсѧ, бли̑жнимъ слꙋжи́ти на́съ наꙋча́ѧй: ра́дꙋйсѧ бли́жнихъ люби́ти на́съ наставлѧ́ющїй.

Ра́дꙋйсѧ, ѡ҆́бразъ житїѧ̀ пра́веднагѡ на́мъ показꙋ́ющїй: ра́дꙋйсѧ ꙗ҆́кѡ пра́вило вѣ́ры въ бг҃а, наде́жды на него̀, любвѐ къ немꙋ̀ и҆ бли̑жнимъ и҆ про́чихъ хрⷭ҇тїа́нскихъ добродѣ́телей ꙗ҆вѝ на́мъ собо́ю.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ з҃.

Взы́де на престо́лъ ри́мскїй нечести́вый ца́рь де́кїй, и҆ пролїѧ́сѧ по вселе́ннѣй кро́вь хрⷭ҇тїа́нскаѧ. Прибли́жисѧ вре́мѧ, є҆гда̀ и҆ тебє̀, ст҃ы́й мꙋ́чениче, сꙋдѝ гдⷭ҇ь под̾ѧ́ти страда̑нїѧ, да кро́вїю и҆ мꙋ́ченичествомъ твои́мъ запечатлѣ́еши вѣ́рꙋ и҆ вели́кꙋю свою̀ любо́вь къ бг҃ꙋ, и҆ тѣ́мъ до конца̀ низложи́ши сопроти̑вныѧ си̑лы и҆ наста́виши мно́гихъ, да грѧдꙋ́тъ на мꙋчє́нїѧ, ра́дꙋющесѧ, ꙗ҆́коже и҆ ты̀, страстоте́рпче, и҆ пою́ще бг҃ꙋ: А҆ллилꙋ́їа.

І҆́косъ з҃.

Ꙗ҆́кѡ ᲂу҆кры́тисѧ не мо́жетъ гра́дъ верхꙋ̀ горы̀ стоѧ́й, та́кѡ и҆ тебѣ̀, ст҃ы́й мꙋ́чениче, гоне́нїю ѿ де́кїа царѧ̀ на хрⷭ҇тїа́нъ бы́вшꙋ, невозмо́жнѡ бы́сть ᲂу҆кры́тисѧ ѿ мꙋчи́телей, и҆́бо ты̀, ꙗ҆́вѣ без̾ стра́ха хрⷭ҇та̀ всѣ̑мъ и҆сповѣ́давъ, си́лою сло́ва ѡ҆браще́нїе мно́гихъ ко хрⷭ҇тꙋ̀ ᲂу҆стро́илъ, и҆ мнѡ́гїѧ ѿ недꙋ̑гъ и҆́менемъ є҆гѡ̀ и҆сцѣли́лъ є҆сѝ. ᲂу҆вѣ́дѣвше же ѡ҆ тебѣ̀, ст҃ы́й трѵ́фѡне, и҆ге́мѡнъ а҆кѵїлі́нъ, взѧ̀ тѧ̀ и҆ пред̾ сꙋди́щемъ поста́ви, ты́ же всѧ̑ грѧдꙋ̑щаѧ на тѧ̀ въ рꙋ́цѣ бг҃а твоегѡ̀ преда́лъ є҆сѝ, ра́дꙋѧсѧ, ꙗ҆́кѡ и҆ тѧ̀ сподо́би гдⷭ҇ь бы́ти ѻ҆́бщника страда́нїй є҆гѡ̀, и҆ вѣ́рнїи, ви́дѧще ре́вность твою̀ по бз҃ѣ, вопїѧ́хꙋ тѝ:

Ра́дꙋйсѧ, трѵ́фѡне, ко сп҃се́нїю мно́гихъ приведы́й: ра́дꙋйсѧ мно́гихъ ѿ ѕловѣ́рїѧ къ вѣ́рѣ и҆́стиннѣй, правосла́внѣй ѡ҆брати́вый.

Ра́дꙋйсѧ, чꙋдесы̀ твои́ми, си́лою бж҃їею содѣ́ѧнными въ вѣ́рѣ, и҆́ми воспрїѧ́той, и҆̀хъ ᲂу҆тверди́вый: ра́дꙋйсѧ ꙗ҆́кѡ дѣ́йственнаѧ вѣ́ра твоѧ̀ въ бг҃а вы́нꙋ всѣ̑мъ по все́й вселе́ннѣй ꙗ҆ви́сѧ.

Ра́дꙋйсѧ, безме́здный врачꙋ̀, си́лою бж҃їею, ꙗ҆́коже дре́влѣ, та́кожде и҆ ны́нѣ всѧ́кꙋю болѣ́знь ско́рѡ врачꙋ́ющїй: ра́дꙋйсѧ наде́ждо ѡ҆ста́вленныхъ врача́ми.

Ра́дꙋйсѧ, ско́рое ᲂу҆тѣше́нїе болѧ́щихъ, къ тебѣ̀ съ моли́твою прибѣга́ющихъ: ра́дꙋйсѧ небоѧ́зненнѡ проповѣ́давый хрⷭ҇то́вꙋ вѣ́рꙋ.

Ра́дꙋйсѧ, ѿ невѣ́рныхъ за про́повѣдь хрⷭ҇та̀ бг҃а на мꙋче́нїе ꙗ҆́тый: ра́дꙋйсѧ не ᲂу҆страши́выйсѧ грѧдꙋ́щагѡ мꙋче́нїѧ.

Ра́дꙋйсѧ, наꙋча́ющїй на́съ не боѧ́тисѧ чл҃вѣ́ческихъ преще́нїй: ра́дꙋйсѧ во все́мъ на бг҃а ᲂу҆пова́нїе возложи́вый.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ и҃.

Оу҆слы́шавъ, ꙗ҆́кѡ и҆́щꙋтъ тѧ̀ во́ини, не ᲂу҆таи́лсѧ є҆сѝ ѿ ни́хъ, мꙋ́чениче, ни въ гора́хъ, ни въ пꙋсты́нехъ, но, ѡ҆гради́всѧ моли́твою и҆ кресто́мъ, дерзнове́ннѡ себє̀ преда́лъ є҆сѝ въ рꙋ́цѣ мꙋчи́телей и҆ съ ра́достїю вели́кою стѡпы̀ твоѧ̑ напра́вилъ є҆сѝ въ нїке́ю, да возвѣсти́ши всѣ̑мъ вѣ́рꙋ и҆́стиннꙋю и҆ наста́виши пѣ́ти бг҃ꙋ: А҆ллилꙋ́їа.

І҆́косъ и҃.

Є҆гда̀ вопросѝ тѧ̀ и҆ге́мѡнъ на сꙋди́лище: кто̀ є҆сѝ, ка́ѧ сꙋдьба̀ твоѧ̀, и҆ ка́кѡ вѣ́рꙋеши; ты̀, не ѡ҆бинꙋ́ѧсѧ, ѿвѣща́лъ є҆сѝ є҆мꙋ̀ си́це: трѵ́фѡнъ и҆́мѧ моѐ: ѻ҆те́чество комѱа́да: сꙋдьбы́ же нѣ́сть ᲂу҆ на́съ, занѐ вѣ́рꙋемъ, ꙗ҆́кѡ всѧ̑ про́мысломъ бж҃їимъ быва́ютъ. По вѣ́рѣ же хрⷭ҇тїа́нинъ є҆́смь, хрⷭ҇то́съ же є҆́сть и҆ моѧ̀ си́ла, и҆ моѧ̀ крѣ́пость, и҆ сла́ва, и҆ ра́дость моѧ̀. Сїѐ и҆сповѣ́данїе твоѐ слы́шаще, ᲂу҆бл҃жа́емъ тѧ̀, ст҃ы́й трѵ́фѡне, си́це:

Ра́дꙋйсѧ, непра́ведномꙋ сꙋди́лищꙋ дерзнове́ннѡ предста́вый: ра́дꙋйсѧ вѣ́рꙋющихъ въ про́мыслъ бж҃їй ᲂу҆крѣплѧ́ѧй.

Ра́дꙋйсѧ, лю́ди, живо́тъ сво́й сꙋдьбѣ̀ ввѣрѧ́ющыѧ, посрамлѧ́ѧй: ра́дꙋйсѧ наꙋча́ѧй на́съ во все́мъ ᲂу҆пова́нїе на́ше на бг҃а возлага́ти.

Ра́дꙋйсѧ, вы́нꙋ себє̀ бы́ти слꙋжи́телѧ хрⷭ҇то́ва и҆сповѣ́дꙋѧй: ра́дꙋйсѧ и҆сповѣ́данїемъ тѣ́мъ весе́лїе вѣ̑рнымъ да́рꙋѧй.

Ра́дꙋйсѧ, собо́рища нечести́выхъ и҆сповѣ́данїемъ ст҃ы́мъ ѿлꙋчи́выйсѧ: ра́дꙋйсѧ грѧдꙋ́щихъ мꙋче́нїй ѿ нечести́выхъ за и҆сповѣ́данїе и҆́стиннагѡ бг҃а не ᲂу҆страши́выйсѧ.

Ра́дꙋйсѧ, и҆́стинꙋ є҆ди́нꙋю бж҃е́ственнꙋю возлюби́вый: ра́дꙋйсѧ лжѝ и҆ ѻ҆тца̀ є҆ѧ̀, дїа́вола, ѿвергі́йсѧ.

Ра́дꙋйсѧ, хрⷭ҇та̀ твои́мъ ᲂу҆пова́нїемъ и҆менꙋ́ѧй: ра́дꙋйсѧ є҆го̀ свое́ю крѣ́постїю нарица́ѧй.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ ѳ҃.

Слы́шавше твоѐ и҆сповѣ́данїе, ꙗ҆́рости и҆спо́лнишасѧ нечести́вїи и҆ преща́хꙋ тѝ ра́нами и҆ мꙋче́нїемъ. Ты́ же, мꙋ́чениче трѵ́фѡне, под̾ѧ́тїе страда́нїй за хрⷭ҇та̀ весе́лїемъ почита́ѧ, взыва́лъ є҆сѝ немо́лчнѡ бг҃ꙋ пѣ́снь: А҆ллилꙋ́їа.

І҆́косъ ѳ҃.

Вѣті́ѧ многовѣща́нный а҆кѵїлі́нъ ви́дѧ, ꙗ҆́кѡ ты̀ не ᲂу҆боѧ́лсѧ є҆сѝ преще́нїй лю́тыхъ, ꙗ҆́кѡ ѻ҆вча̀ кро́ткое ꙗ҆ви́сѧ, и҆ща̀ прельсти́ти тѧ̀ словесы̀ ласка́тельными, но ничто́же ᲂу҆спѣва́ѧ, па́ки въ во́лка лю́тагѡ ѡ҆бра́щьсѧ, ᲂу҆сꙋгꙋблѧ́ше прещє́нїѧ своѧ̑. Ты́ же тве́рдъ и҆ непоколеби́мъ пребы́лъ є҆сѝ бл҃года́тїю бж҃їею, воздвиза́ѧ вѣ́рныхъ возглаша́ти тебѣ̀ сицєва́ѧ:

Ра́дꙋйсѧ, преще́нїй лю́тыхъ не ᲂу҆боѧ́выйсѧ: ра́дꙋйсѧ сме́рти тѣле́сной не ᲂу҆страши́выйсѧ.

Ра́дꙋйсѧ, дꙋ́шꙋ свою̀ за вѣ́рꙋ правосла́внꙋю положи́ти не ѿре́кшїйсѧ: ра́дꙋйсѧ ра́зꙋмъ соверше́нный въ то́мъ положи́вый, да сохрани́ши вѣ́рꙋ и҆́стиннꙋю во є҆ди́нагѡ бг҃а.

Ра́дꙋйсѧ, не къ земнѣ́й, но къ нбⷭ҇нѣй мꙋ́дрости ᲂу҆стреми́выйсѧ: ра́дꙋйсѧ и҆ге́мѡнꙋ, врагꙋ̀ твоемꙋ̀, сп҃се́нїѧ жела́вый.

Ра́дꙋйсѧ, къ позна́нїю и҆́стиннагѡ бг҃а привестѝ мꙋчи́телѧ твоегѡ̀ тща́выйсѧ: ра́дꙋйсѧ проповѣ́дниче хрⷭ҇то́въ сладкогла́сный.

Ра́дꙋйсѧ, хрⷭ҇тїа́нине, хрⷭ҇то́мъ возлю́бленный: ра́дꙋйсѧ во́лею на страда̑нїѧ ше́дый.

Ра́дꙋйсѧ, мꙋче́нїй тѣ́хъ за хрⷭ҇та̀, ꙗ҆́кѡ сокро́вища, хотѣ́вый: ра́дꙋйсѧ во вре́мѧ мꙋче́нїй лю́тыхъ бж҃е́ственнымъ свѣ́томъ ѡ҆сїѧ́нный.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ і҃.

Оу҆слы́шавъ тѧ̀ глаго́лавша, ꙗ҆́кѡ не и҆сповѣ́дꙋющихъ и҆́стинныѧ, правосла́вныѧ вѣ́ры жре́бїй є҆́сть ѻ҆́гнь неꙋгаси́мый, ѕѣлѡ̀ разгнѣ́васѧ а҆кѵїлі́нъ и҆ повелѣ̀ тѧ̀, ст҃ы́й трѵ́фѡне, повѣ́сивъ, би́ти: ты́ же, въ повелѣ́нїи се́мъ ᲂу҆слы́шавъ гдⷭ҇ень гла́съ, призыва́вшїй тѧ̀ на страда́льческїй по́двигъ, возопи́лъ є҆сѝ бг҃ꙋ: А҆ллилꙋ́їа.

І҆́косъ і҃.

Ꙗ҆́кѡ свѣща̀ ѻ҆гне́мъ возгара́етсѧ, та́кѡ дꙋша̀ твоѧ̀, ст҃ы́й трѵ́фѡне, возгорѣ́сѧ любо́вїю къ возлюби́вшемꙋ тѧ̀ бг҃ꙋ, и҆, ᲂу҆слы́шавъ повелѣ́нїе и҆ге́мѡна, є҆́же на тѧ̀, са́мъ совле́клъ є҆сѝ ри̑зы твоѧ̑ и҆ тѣ́ло твоѐ преда́лъ є҆сѝ въ рꙋ́цѣ мꙋчи́телей, да сотворѧ́тъ всѧ̑, ꙗ҆̀же повелѣ̀ и҆ге́мѡнъ. Зрѧ́ще таковꙋ́ю ре́вность твою̀ по бз҃ѣ, всѝ вѣ́рнїи глаго́лахꙋ:

Ра́дꙋйсѧ, съ весе́лїемъ ᲂу҆гото́вавый себє̀ къ прїѧ́тїю ра̑нъ за хрⷭ҇та̀: ра́дꙋйсѧ ри́зъ свои́хъ совлекі́йсѧ ра́ди ѡ҆бнаже́ннагѡ нѣ́когда за грѣхи̑ на́шѧ и҆скꙋпи́телѧ.

Ра́дꙋйсѧ, доброво́льнѡ въ рꙋ́цѣ мꙋчи́телей себє̀ преда́вый, хрⷭ҇тꙋ̀ подража́ѧ: ра́дꙋйсѧ ѿ ни́хъ свѧ́занный и҆ повѣ́шенный на мꙋче́нїе.

Ра́дꙋйсѧ, прїѧ́вый за хрⷭ҇та̀ лю̑таѧ ᲂу҆дарє́нїѧ: ра́дꙋйсѧ трѝ часа̀ терпѣ́вый неща́дное бїе́нїе.

Ра́дꙋйсѧ, мꙋ́чимꙋ бы́вшꙋ, ни є҆ди́нагѡ стена́нїѧ и҆ ни є҆ди́нагѡ гла́са и҆спꙋсти́вый: ра́дꙋйсѧ бїє́нїѧ, ᲂу҆́зы, ра̑ны, ѡ҆палє́нїѧ и҆ и҆ны̑ѧ многоразли̑чныѧ страда̑нїѧ претерпѣ́вый.

Ра́дꙋйсѧ, въ молча́нїи прїѧ́вый ᲂу҆дарє́нїѧ, ѿ ни́хже ра́нами и҆з̾ѧ́звисѧ тѣ́ло твоѐ: ра́дꙋйсѧ страда́нїемъ твои́мъ си́лꙋ бж҃їю просла́вивый.

Ра́дꙋйсѧ, терпѣ́нїемъ твои́мъ мꙋчи́телей посрами́вый: ра́дꙋйсѧ по́двигомъ твои́мъ хрⷭ҇тїа́нъ возвесели́вый.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ а҃і.

Ви́дѣша терпѣ́нїе и҆ по́двигъ тво́й, ст҃ы́й трѵ́фѡне, є҆ще́ же и҆ а҆дама́нтовꙋ крѣ́пость твою̀, просла́виша предстоѧ́щїи лю́дїе подвигополо́жника хрⷭ҇та̀ бг҃а пѣ́снїю: А҆ллилꙋ́їа.

І҆́косъ а҃і.

Ꙗ҆́кѡ стѣ́нꙋ тве́рдꙋ и҆ непоколеби́мꙋ ви́дѣ тѧ̀ нечести́вый сꙋдїѧ̀, ѻ҆ба́че не просла́ви бг҃а, дарова́вшагѡ тебѣ̀ крѣ́пость сїю̀, но па́че тща́шесѧ склони́ти тѧ̀ и҆ ле́стїю, и҆ стра́хомъ сме́рти, да принесе́ши же́ртвꙋ бѣсовѡ́мъ. Ты́ же, ст҃ы́й мꙋ́чениче, и҆сповѣ́давъ во ᲂу҆́шїю всѣ́хъ вѣ́рꙋ хрⷭ҇то́вꙋ, ѡ҆бличи́лъ є҆сѝ безꙋ́мїе гони́телей и҆ показа́лъ є҆сѝ мꙋ́дрость тѣ́хъ, и҆́же во хрⷭ҇та̀ вѣ́рꙋютъ: и҆ге́мѡнъ же, и҆змышлѧ́ѧ на тѧ̀ и҆на̑ѧ мꙋчє́нїѧ, повелѣ̀ тѧ̀ со столпа̀ снѧ́ти и҆, привѧза́въ къ коню̀ своемꙋ̀, влечѐ за собо́ю. Мы́ же потщи́мсѧ просла́вити страда̑нїѧ твоѧ̑ си́це:

Ра́дꙋйсѧ, ᲂу҆ѧ́звленный тѣ́ломъ и҆ за коне́мъ бы́стрѡ влеко́мый: ра́дꙋйсѧ хла́дъ зи́мнїй претерпѣ́вый.

Ра́дꙋйсѧ, наꙋча́ѧй на́съ въ ско́рбѣхъ земны́хъ ᲂу҆́мъ сво́й къ бг҃ꙋ ᲂу҆стремлѧ́ти: ра́дꙋйсѧ наставлѧ́ѧй въ мі́рѣ се́мъ хла́дномъ согрѣва́тисѧ любо́вїю, ꙗ҆́же къ бг҃ꙋ.

Ра́дꙋйсѧ, дѣ́ломъ на́мъ показꙋ́ѧй, ка́кѡ подоба́етъ ни во что́же вмѣнѧ́ти скоропреходѧ̑щаѧ на землѝ страда̑нїѧ: ра́дꙋйсѧ любвѐ и҆ милосе́рдїѧ ко всѣ̑мъ лю́демъ и҆спо́лненный.

Ра́дꙋйсѧ, ра́ди любвѐ тоѧ̀ за врагѝ твоѧ̑ моли̑твы бг҃ꙋ возноси́вый: ра́дꙋйсѧ па́ки въ темни́цꙋ вве́рженный и҆ въ заточе́нїи лю́томъ томле́нїе, мꙋ́кꙋ и҆ болѣ̑зни претерпѣ́вый.

Ра́дꙋйсѧ, ꙗ҆́снѡ ꙗ҆влѧ́ющїй, ꙗ҆́кѡ лютѣ̑йшаѧ страда̑нїѧ земна̑ѧ ничто́же сꙋ́ть, а҆́ще къ бг҃ꙋ прибѣга́ютъ лю́дїе и҆ бг҃а ра́ди терпѧ́тъ скѡ́рби и҆ ра̑ны: ра́дꙋйсѧ на ᲂу҆сѣкнове́нїе главы̀ твоеѧ̀ ра́достнѡ ше́дый и҆ пред̾ ᲂу҆сѣкнове́нїемъ тѣ́мъ въ рꙋ́цѣ бг҃а твоегѡ̀, є҆го́же ра́ди всѧ̑ лю̑таѧ под̾ѧ́лъ є҆сѝ, дꙋ́шꙋ свою̀ ст҃ꙋ́ю преда́вый.

Ра́дꙋйсѧ, пре́жде ᲂу҆сѣкнове́нїѧ моли́выйсѧ ѡ҆ всѧ́комъ, и҆́же воспомина́ти тѧ̀ и҆ въ па́мѧть твою̀ ст҃ы́ѧ жє́ртвы приноси́ти бꙋ́детъ, да ᲂу҆слы́шитъ є҆го̀ гдⷭ҇ь и҆ всѧ́кое проше́нїе є҆гѡ̀ и҆спо́лнитъ: ра́дꙋйсѧ по ᲂу҆спе́нїи твое́мъ въ видѣ́нїи повелѣ́вый погребстѝ тѧ̀ во ѻ҆те́чествїи твое́мъ, наꙋча́ѧ тѣ́мъ и҆ на́съ своѐ ѻ҆те́чество люби́ти.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ в҃і.

Не то́кмѡ на землѝ, ст҃ы́й мꙋ́чениче, бы́лъ є҆сѝ помо́щникъ и҆ застꙋ́пникъ всѣ̑мъ, твоеѧ̀ по́мощи тре́бꙋющымъ, но и҆ по сме́рти не престае́ши и҆збавлѧ́ти ѿ бѣ́дъ къ тебѣ̀ съ вѣ́рою и҆ любо́вїю притека́ющихъ, ꙗ҆́коже и҆зба́вилъ є҆сѝ ца́рскагѡ гнѣ́ва болѧ́рина трѵ́фѡна, є҆гда̀ внеза́пꙋ ꙗ҆ви́лсѧ є҆мꙋ̀ на конѣ̀, и҆ да́лъ є҆сѝ є҆мꙋ̀ ѿлетѣ́вшагѡ ца́рскагѡ со́кола. Ѻ҆́ный же трѵ́фѡнъ соко́льникъ на мѣ́стѣ се́мъ, и҆дѣ́же є҆мꙋ̀ ѿ тебє̀ по́мощь ꙗ҆ви́сѧ, во бл҃годаре́нїе тебѣ̀ за и҆збавле́нїе своѐ воздви́же ст҃ы́й хра́мъ во и҆́мѧ твоѐ, мꙋ́чениче трѵ́фѡне. Мы́ же бл҃годѣѧ̑нїѧ ѿ тебє̀ бы̑вшаѧ воспомина́юще, возно́симъ бл҃года́рственнꙋю бг҃ꙋ пѣ́снь: А҆ллилꙋ́їа.

І҆́косъ в҃і.

Пою́ще твоѧ̑ многоразли̑чнаѧ чꙋдеса̀, твою̀ ди́внꙋю и҆ ско́рꙋю по́мощь, ꙗ҆́кѡ никого́же ᲂу҆се́рднѡ прибѣга́ющаго къ тебѣ̀ съ вѣ́рою, любо́вїю и҆ ᲂу҆пова́нїемъ никогда́же ѿри́нꙋлъ є҆сѝ, но всѣ́хъ къ тебѣ̀ притека́ющихъ и҆ пред̾ ст҃о́ю і҆кѡ́ною твое́ю смире́ннѡ молѧ́щихсѧ ѿ внеза́пныхъ бѣ́дъ и҆ скорбе́й и҆збавлѧ́еши, про́чее вре́мѧ живота̀ и҆̀хъ во бла́го ᲂу҆строѧ́еши, недꙋ́зи врачꙋ́еши, печа̑ли ᲂу҆толѧ́еши, и҆ комꙋ́ждо въ бѣда́хъ и҆ ско́рбехъ къ тебѣ̀ припа́дающемꙋ по́мощь и҆ ѡ҆сла́бꙋ да́рꙋеши, бл҃года́рнѣ восхвалѧ́емъ тѧ̀ си́це:

Ра́дꙋйсѧ, на̑ша молє́нїѧ и҆ прошє́нїѧ прїе́млѧй: ра́дꙋйсѧ за ны̀ пред̾ прⷭ҇то́ломъ бж҃їимъ молѧ́щїйсѧ.

Ра́дꙋйсѧ, ѿ бг҃а ми́лѡсти на́мъ непреста́ннѡ просѧ́щїй: ра́дꙋйсѧ ѿ неча́ѧнныхъ бѣ́дъ и҆ ѕѡ́лъ непрело́жное на́ше и҆збавле́нїе.

Ра́дꙋйсѧ, ѿ бѣ́дъ и҆ напа́стей, дви́жимыхъ на ны̀ грѣ́хъ ра́ди на́шихъ, ско́рое прибѣ́жище: ра́дꙋйсѧ мнѡ́гїѧ сле́зы, ѿ ско́рби пролива́ємыѧ, и҆зсꙋши́вый.

Ра́дꙋйсѧ, мнѡ́гїѧ печа̑ли ᲂу҆толи́вый: ра́дꙋйсѧ ꙗ҆́кѡ никто́же, припа́дый ко ст҃ѣ́й і҆кѡ́нѣ твое́й, то́щь ѿ неѧ̀ ѿи́де.

Ра́дꙋйсѧ, всѧ́кагѡ притека́ющагѡ къ тебѣ̀ под̾ кро́въ сво́й и҆ застꙋпле́нїе прїе́млѧй: ра́дꙋйсѧ здра́вїѧ тре́бꙋющымъ ско́рое и҆сцѣле́нїе.

Ра́дꙋйсѧ, ѡ҆ста́вленныхъ врача́ми и҆ ра́ди неисцѣ́льныхъ и҆ тѧ́жкихъ недꙋ̑гъ свои́хъ ча́ющихъ себѣ̀ сме́рти, ско́рое и҆ безме́здное врачева́нїе: ра́дꙋйсѧ и҆ ны́нѣ, ꙗ҆́коже и҆ дре́влѣ, жи́вꙋ тѝ сꙋ́щꙋ, неизсѧка́емый и҆сто́чниче неизче́тныхъ и҆ многоѻбра́зныхъ чꙋдотворе́нїй.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ г҃і.

Ѽ, ст҃ы́й мꙋ́чениче трѵ́фѡне! Прїимѝ сїѐ ма́лое, ѻ҆ба́че ѿ лю́бѧщихъ и҆ бл҃года́рныхъ сердє́цъ приноси́мое тебѣ̀ на́ше моле́нїе, вознесѝ ко гдⷭ҇ꙋ бг҃ꙋ тє́плыѧ моли̑твы твоѧ̑ за ны̀, недостѡ́йныѧ: болѧ́щыѧ и҆сцѣлѝ, печа̑льныѧ ᲂу҆тѣ́ши, заблꙋ́ждшыѧ вразꙋмѝ, бѣ́дствꙋющымъ помозѝ, и҆ всѧ̑ на́мъ потрє́бнаѧ длѧ здра́вїѧ тѣле́снагѡ и҆ сп҃се́нїѧ дꙋше́внагѡ ᲂу҆ бг҃а щедрода́вца и҆спросѝ, наипа́че же и҆зба́ви на́съ ѿ лꙋка́выхъ бѣсѡ́въ, да па́мѧтꙋѧ вы́нꙋ твоѧ̑ ди̑внаѧ ѡ҆ на́съ застꙋплє́нїѧ, просла́вимъ бг҃а, дарова́вшаго на́мъ такова́гѡ моли́твенника, цѣли́телѧ и҆ чꙋдотво́рца, воспѣва́юще пѣ́снь: А҆ллилꙋ́їа.

Се́й конда́къ гл҃го́ли три́жды. И҆ па́ки і҆́косъ а҃-й и҆ конда́къ а҃-й.

І҆́косъ а҃.

Ра́дꙋйсѧ, добронра́вныхъ роди́телей бл҃гочести́вый сы́не: ра́дꙋйсѧ, вели́кое и҆̀хъ ᲂу҆тѣше́нїе.

Ра́дꙋйсѧ, ѿ ю҆́ности хрⷭ҇та̀ возлюби́вый: ра́дꙋйсѧ ѿ ма́лыхъ лѣ́тъ бл҃года́ть бж҃їю ѻ҆би́льнѡ стѧжа́вый.

Ра́дꙋйсѧ, дꙋ́шꙋ свою̀ непоро́чнꙋ ꙗ҆ви́вый: ра́дꙋйсѧ себє̀ самагѡ̀ въ хра́мъ дх҃а ст҃а́гѡ ᲂу҆гото́вавый.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Конда́къ а҃.

Ра́дꙋйсѧ, трѵ́фѡне, ско́рый помо́щниче всѣ̑мъ, съ вѣ́рою и҆ любо́вїю къ тебѣ̀ притека́ющымъ.

Мл҃тва.

Ѽ ст҃ы́й мч҃ниче хрⷭ҇то́въ трѵ́фѡне, ско́рый помо́щниче всѣ̑мъ къ тебѣ̀ прибѣга́ющымъ, и҆ молѧ́щымсѧ предъ ст҃ы́мъ твои́мъ ѻ҆́бразомъ, скоропослꙋ́шный предста́телю! ᲂу҆слы́ши ᲂу҆̀бо ны́нѣ и҆ на всѧ́кїй ча́съ моле́нїе на́съ, недосто́йныхъ рабѡ́въ твои́хъ, почита́ющихъ ст҃ꙋ́ю па́мѧть твою̀, и҆ предста́тельствꙋй ѡ҆ на́съ предъ гдⷭ҇емъ на всѧ́комъ мѣ́стѣ. ты́ бо, ᲂу҆го́дниче хрⷭ҇то́въ, въ вели́кихъ чꙋдесѣ́хъ возсїѧ́вый, пре́жде и҆схо́да твоегѡ̀ ѿ житїѧ̀ сегѡ̀ тлѣ́ннагѡ моли́лсѧ є҆сѝ ко гдⷭ҇ꙋ и҆ и҆спроси́лъ є҆сѝ ᲂу҆ негѡ̀ да́ръ се́й: а҆́ще кто̀ въ ко́ей ли́бо нꙋ́ждѣ, бѣдѣ̀, печа́ли и҆ болѣ́зни дꙋше́внѣй и҆лѝ тѣле́снѣй призыва́ти начне́тъ ст҃о́е и҆́мѧ твоѐ, то́й да и҆зба́вленъ бꙋ́детъ ѿ всѧ́кагѡ прило́га ѕла́гѡ, и҆ ꙗ҆́коже ты̀ и҆ногда̀ дще́рь царе́вꙋ, во гра́дѣ ри́мѣ ѿ дїа́вола мꙋ́чимꙋ, и҆сцѣли́лъ є҆сѝ, си́це и҆ на́съ ѿ лю́тыхъ є҆гѡ̀ ко́зней сохранѝ во всѧ̑ дни̑ живота̀ на́шегѡ, наипа́че же въ де́нь стра́шный послѣ́днѧгѡ на́шегѡ и҆здыха́нїѧ предста́тельствꙋй ѡ҆ на́съ, бꙋ́ди на́мъ тогда̀ помо́щникъ, и҆ ско́рый прогони́тель лꙋка́выхъ дꙋхѡ́въ, и҆ къ црⷭ҇твїю нбⷭ҇номꙋ предводи́тель, и҆дѣ́же ты̀ ны́нѣ предстои́ши съ ли̑ки ст҃ы́хъ ᲂу҆ прⷭ҇то́ла бж҃їѧ, молѝ гдⷭ҇а, да сподо́битъ и҆ на́съ прича́стники бы́ти присносꙋ́щнагѡ весе́лїѧ и҆ ра́дости, да съ тобо́ю кꙋ́пнѡ ᲂу҆досто́имсѧ сла́вити: ѻ҆ц҃а̀ и҆ сн҃а и҆ ст҃а́го ᲂу҆тѣ́шителѧ дх҃а, во вѣ́ки. А҆ми́нь.

Кондак, глас 8*

Тро́ическою тве́рдостию/ многобо́жие разруши́л еси́ от коне́ц, всесла́вне,/ че́стен во Христе́ быв, и, победи́в мучи́тели во Христе́ Спаси́теле,/ вене́ц прия́л еси́ му́ченичества твоего́/ и дарова́ния Боже́ственных исцеле́ний,// я́ко непобеди́мь.

Перевод: Силою Троицы разрушил ты многобожие в пределах земных, преславный, досточтимым пред Господом став; и, победив мучителей Христом Спасителем, получил венец мученичества твоего и дарования Божественных исцелений, как непобедимый.

Чинопоследование

Просительный молебен – это краткое моление к Господу, Пресвятой Богородице, ангелам или святым угодникам, совершаемое в храме, часовне, доме и даже под открытым небом (например, молебен о даровании дождя часто служат прямо в поле).

Просительный молебен бывает:

простой
с водосвятием
с акафистом.

Любой молебен начинается с возгласа иерея и пения молитвы Святому Духу «Царю Небесный». Затем произносится ектения, поются тропари на «Бог Господь», запевы, читается Евангелие и в некоторых случаях Апостол. После Евангелия священник произносит сугубую ектению, на которой перечисляет имена присутствующих на молебне и их близких, чьи имена написаны в записках. Молебен с водосвятием отличается от обычного тем, что к обычным молитвословиям присоединяется чин малого освящения воды. Молебен с акафистом — это обычный или водосвятный молебен, к которому добавляется чтение акафиста. Его служат в дни престольных праздников, перед особо чтимыми иконами, тогда, когда нужно сугубо помолиться о чем-то.

Молитва 1‑я**

Аудио:

2:14

О, святы́й му́чениче Христо́в Три́фоне, ско́рый помо́щниче всем к тебе́ прибега́ющим, и моля́щимся пред святы́м твои́м о́бразом скоропослу́шный предста́телю! Услы́ши ны́не и на вся́кий час моле́ние нас, почита́ющих святу́ю па́мять твою́, и предста́тельствуй о нас пред Го́сподем на вся́ком ме́сте. Ты бо, уго́дниче Христо́в, святы́й му́чениче и чудотво́рче Три́фоне, в вели́ких чудесе́х возсия́вый, пре́жде исхо́да твоего́ от жития́ сего́ тле́ннаго моли́лся еси́ за ны ко Го́споду и испроси́л еси́ у Него́ дар сей: а́ще кто в ко́ей-ли́бо ну́жде, беде́, печа́ли и боле́зни душе́вней или́ теле́сней призыва́ти на́чнет свято́е и́мя твое́, той изба́влен бу́дет от вся́каго прило́га зла́го. И я́коже ты не́когда дщерь царе́ву, во гра́де Ри́ме от диа́вола му́чиму, исцели́л еси́, си́це и нас от лю́тых его́ ко́зней сохрани́ во вся дни жития́ на́шего, наипа́че же в день после́дняго на́шего издыха́ния предста́тельствуй о нас. Бу́ди нам тогда́ помо́щник, и ско́рый прогони́тель лука́вых духо́в, и к Ца́рствию Небе́сному предводи́тель, иде́же ты ны́не предстои́ши с ли́ки святы́х у Престо́ла Бо́жия. Моли́ Го́спода, да сподо́бит и нас прича́стники бы́ти присносу́щнаго весе́лия и ра́дости, да с тобо́ю ку́пно удосто́имся сла́вити Отца́, и Сы́на, и Свята́го Уте́шителя Ду́ха во ве́ки веко́в. Ами́нь.

Перевод: О, святой мученик Христов Трифон, скорый помощник и всем, к тебе прибегающим и молящимся пред святым твоим образом скоро слышащий их заступник! Услышь ныне и на всякий час моление нас, недостойных рабов твоих, почитающих святую память твою во всесвященном храме сем, и ходатайствуй о нас пред Господом на всяком месте. Ибо, ты угодник Христов, великими чудесами просиявший, источаешь исцеления прибегающим к тебе с верою и находящихся в скорбях людей защищаешь, как сам ты обещал прежде исхода твоего от жития сего тленного молиться за нас ко Господу и испросил у Него такой дар: если кто в какой-либо нужде, печали и болезни душевной или телесной призывать начнет святое имя твое, тот да избавлен будет от всякого нападения злого. И как ты некогда царскую дочь во граде Риме мучимую диаволом исцелил, так и нас от лютых его козней сохрани во все дни жизни нашей, особенно же в день последнего нашего вздоха ходатайствуй о нас. Будь нам тогда помощником и скоро прогони лукавых духов, и в Царство Небесное приведи. И там, где ты ныне предстоишь с сонмами святых у Престола Божия, моли Господа, да сподобит и нас стать причастниками вечного веселия и радости, дабы мы с тобою вместе прославляли Отца и Сына и Святого Утешителя Духа во веки. Аминь.

LiveInternetLiveInternet

Кондак 1

Избранный от Бога и к лику святых сопричтенный, святый мучениче Трифоне! Молися о нас, грешных, Владыце Христу и помогай нам побеждати мир, плоть и диавола, многообразно воюющия на ны, якоже победил еси их благодатию и силою возлюбленнаго тобою Христа, да, избавльшеся от врагов наших видимых и невидимых, благодарственно воззовем ти: Радуйся, Трифоне, скорый помощниче всем, с верою и любовию к тебе притекающим!
Икос 1
Образу благочестия родителей твоих подражая, христианския нравы от лет малых приял еси, святый мучениче, и мал сый леты, стар же разумом, воистину христианин совершен явился еси. Мы же, воспоминающе добродетельное житие твое, восхваляем тя сице: Радуйся, добронравных родителей благочестивый сыне; радуйся, великое их утешение. Радуйся, Ангела твоего Хранителя непрестанное веселие; радуйся, от юности твоея всего себе Богу предавый. Радуйся, от юности Христа возлюбивый; радуйся, от малых лет благодать Божию обильно стяжавый. Радуйся, душу свою непорочну явивый; радуйся, себе самаго в храм Духа Святаго уготовавый. Радуйся, отроком образ жития святаго показавый; радуйся, благочестием твоим верныя возвеселяяй. Радуйся, от малых лет за вся сия Богом возлюбленный. Радуйся, Трифоне, скорый помощниче всем, с верою и любовию к тебе притекающим.

Кондак 2

Видя Господь, яко волею по стези благочестия, в немже от родите-лей твоих наставлен был еси, течеши, и яко воистинну любиши Бога, сотвори тя в жилище Святаго Духа от лет малых и отверзе уста твоя пети Ему: Аллилуиа. Икос 2

Силу веры твоея показуя, Владыка Христос дарова тебе, святый мучениче, еще отроку бывшу, дар чудотворений, сего ради вопием ти: Радуйся, от малых лет совершенную любовь к Богу показавый; радуйся, заповедей Его не токмо слышатель, но и делатель от младенчества бывый. Радуйся, от юности твоея добродетели христианския стяжавый; радуйся, от малых лет житием, верою и любовию твоею Богу угодивый. Радуйся, дар исцелений от Него приявый; радуйся, дар той на пользу ближним иждивающий. Радуйся, многоразличныя болезни исцеляющий; радуйся, в недузех облегчение дарующий. Радуйся, страдания в радость обращающий; радуйся, исцеления сия во славу Божию совершающий. Радуйся, теми истину веры православныя показующий; радуйся, теми нас к славословию Бога возбуждающий. Радуйся, Трифоне, скорый помощниче всем, с верою и любовию к тебе притекающим.
Кондак 3
Верою и любовию стяжал еси от Бога власть изгоняти духи нечистыя, мучащия человеки и претящия им воспевати Богу: Аллилуиа.
Икос 3
Видя дарованную ти, святый мучениче, силу Божию, вспять бежаша демони, имиже одержими бяху бесноватии людие. Видящии же сия, воспеваху ти сице: Радуйся, от Бога власть на нечистыя духи приявый; радуйся, силою Божиею сих изгоняющий. Радуйся, врагу человеческому вредити людем возбраняющий; радуйся, козни диавола и ангелов его разрушающий. Радуйся, силу их низлагающий; радуйся, безсилие их являющий. Радуйся, страхом и трепетом их поражающий; радуйся, веры Христовы силу показующий. Радуйся, верных к прославлению Бога воздвигающий, радуйся, в бедах и скорбех сущих прибегати к предстательству святых наставляющий. Радуйся, в нуждах наших обращатися к Богу научающий; радуйся, помощниче наш, Богом нам дарованный. Радуйся, Трифоне, скорый помощниче всем, с верою и любовию к тебе притекающим.
Кондак 4
Восхотев тобою обратити языки от пути нечестия и открыти им путь истинный, ведущий в Живот Вечный, си есть веру истинную, веру православную, даже до Рима из Компсады приведе тя Господь, да и в чертогах царских проповеси Бога и таю многий научиши пети Ему: Аллилуиа.
Икос 4
Хотяй обратити многия на путь спасения, попусти Господь демону вселитися в дщерь цареву, и жестоко мучити и ввергати ю многочастне во огнь и воду. Врачеве ничтоже успеваху и ничимже страдания дщери царевой утолити возмогоша. Егда же и сильнии мира сего и всякую врачебную хитрость ведущии ничтоже возмогоша и исповедаху немощь свою, тогда велением Божиим проглагола диавол, яко един есть, иже изгнати его имать, и се есть Трифон. Тогда прилежно искаху и обретоша его в Компсаде. Грядущу же ему и еще далече от Рима сущу, возопи гласом велиим диавол и изыде, и исцеле девица. Видящии сия дивляхуся и глаголаху: Радуйся, Трифоне, еще далече сущий в бегство диавола обративый; радуйся, яко диавол безсилие свое пред тобою исповеда. Радуйся, молящимся тебе скорый помощниче; радуйся, недугов силою Божиею целителю. Радуйся, оставленных врачами на свои руце приемлющий; радуйся, печали на радость пременяющий. Радуйся, печальным утешение и скорбящим радование посылающий. Радуйся, Трифоне, скорый помощниче всем, с верою и любовию к тебе притекающим.
Кондак 5
Видеша вернии, иже в Риме, чудо, пришествием твоим бывшее, укрепишася в вере своей и воспеша Богу, победившему адскаго змия и дарующему верующим в Него таковую силу: Аллилуиа.
Икос 5
Уверения ища, тебе пришедшу в Рим, святый Трифон, яко ты еси той, егоже убояся демон, моли тя император Гордиан, да явиши и ему и синклиту его, и людем в чувственном виде диавола, и не отреклся еси, но, возложив на ся пост, помолися Господу дний шесть. В день же седмый, пришедшим царю, синклиту и людем, возопил еси: «Тебе глаголю, душе нечистый, во имя Господа моего Иисуса Христа явися семо и покажи свой демонский образ зде сущим, и безсилие свое исповеждь…». И бысть тако. И зряху вси безобразие демонское и дивляхуся вере святаго, вопиюще: Радуйся, Трифоне, егоже демони ослушатися не могут; радуйся, Трифоне, по егоже велению дуси нечистии в телеснем виде являются. Радуйся, Трифоне, силою Божиею повелевый диаволу исповедати, яко, на христианы, иже святую православную и апостольскую веру содержат, власти не имать; радуйся, Трифоне, емуже возвещено бысть, яко демони власть имут мучити токмо тех, иже своим похотем греховным следуют и дела, угодная диаволу, творят. Радуйся, Трифоне, яко научил еси нас бегати языческаго нечестия; радуйся, Трифоне, яко научаеши всех бегати всякаго греха, в добродетелех же подвизатися. Радуйся, веру православную твердо содержати наставляяй нас; радуйся, хотящим благочестно жити помогаяй. Радуйся, Трифоне, скорый помощниче всем, с верою и любовию к тебе притекающим.
Кондак 6
Видевше, како младо отроча повелевает властно духовом злобы поднебесной, убояхуся мнози, и слышаще от демона и видяще воочию, якову силу имать вера Христова, обратишася к Богу: нечестие же и прочая заблуждения своя отложше, крестишася и усты своими от сердца чиста благодарственно воспеша Богу песнь: Аллилуиа.
Икос 6
Благодаряще тя, царь вложи в руце твои, мучениче, дары и злато, ты же, Христа Бога приобревый ни во чтоже вменил еси вся, яже в мире сем яко блага почитаются, и приял еси дары царевы, да послужиши ближним твоим, и шед во отечество твое Компсаду, дал еси вся нищим, сирым и всем в нужде сущим, непрестанно памятуя, яко расточив богатство земное, тленное, собереши себе на Небеси богатство нетленное, вечное. Мы же, научаемии тобою такожде творити, вопием ти сице: Радуйся, Трифоне, душу свою чужду сребролюбия показавый; радуйся, милосердие души твоея выну являяй. Радуйся, нищих питатель бывый; радуйся, неимущим сострадание показавый. Радуйся, заповедь Христа «Просящему у тебе дай» исполнивый; радуйся, и нас исполняти заповеди Божии научивый. Радуйся, якоже шествием в Рим и возвращением своим в Компсаду многих утешивый, ободривый и возвеселивый; радуйся, показавый нам образ, како богатством гибнущим на земли негиблющее богатство на Небеси собирати. Радуйся, ближним служити нас научающий; радуйся, ближних любити нас наставля-ющий. Радуйся, образ жития праведнаго нам показующий, радуйся, яко правило веры в Бога, надежды на Него, любве к Нему и ближним и прочих христианских добродетелей яви нам собою. Радуйся, Трифоне, скорый помощниче всем, с верою и любовию к тебе притекающим.
Кондак 7
Взыде на престол римский нечестивый царь Декий, и пролияся по вселенней кровь христианская. Приближися время, егда и тебе, святый мучениче, суди Господь подъяти страдания, да кровию и мученичеством своим запечатлееши веру и великую свою любовь к Богу и тем до конца низложиши сопротивныя силы и наставиши многих, да грядут на мучения, радующеся, якоже и ты, страстотерпче, и поюще Богу: Аллилуиа.
Икос 7
Яко укрытися не может град верху горы стояй, тако и тебе, святый мучениче, гонению от Декия царя на христиан бывшу, невозможно бысть укрытися от мучителей, ибо ты, яве без страха Христа всем исповедав, силою слова обращение многих ко Христу устроил и многия в недузех именем Его исцелил еси. Уведевше же о тебе, святый Трифоне, игемон Аквилин, взя тя и пред судищем постави, ты же вся грядущая на тя в руце Бога твоего предал еси, радуяся яко и тя сподоби Господь быти общника страданий его, и вернии, видяще ревность твою по Бозе, вопияху ти: Радуйся, Трифоне, ко спасению многих приведый; радуйся, многих от зловерия к вере истинней, православней обративый. Радуйся, чудесы твоими, силою Божиею содеянными, в вере, ими восприятой, их утвердивый; радуйся, яко действенная вера твоя в Бога выну всем по всей вселенней явися. Радуйся, безмездный врачу, силою Божиею, якоже древле, такожде и ныне всякую болезнь скоро врачующий; радуйся, надеждо оставленных врачами. Радуйся, скорое утешение болящих, на тебя надеясь, с молитвою прибегающих; радуйся, небоязненно проповедавый Христову веру. Радуйся, от неверных за проповедь Христа Бога на мучение ятый; радуйся, не устрашивыйся грядущаго мучения. Радуйся, научающий нас не боятися человеческих прещений; радуйся, во всем на Бога упование возложивый. Радуйся Трифоне, скорый помощниче всем, с верою и любовию к тебе притекающим.
Кондак 8
Услышав, яко ищут тя воини, не утаился еси от них, мучениче, ни в горах, ни в пустынех, но, оградився молитвою и крестом дерзновенно себе предал еси в руце мучителей и с радостию ве-ликою стопы твоя направил в Никею, да возвестиши всем веру истинную и наставиши пети Богу Аллилуиа.
Икос 8
Егда вопроси тя игемон на судилище: «Кто еси, кая судьба твоя, и како веруеши?» ты, не обинуяся, отвещал еси ему сице: «Трифон имя мое; отечество — Компсада, судьбы же несть у нас, зане веруем, яко вся Промыслом Божиим бывают. По вере же — христианин есмь, Христос же есть и моя сила, и моя крепость, и слава, и радость моя». Сие исповедание твое слышаще, ублажаем тя, святый Трифоне, сице: Радуйся, неправедному судилищу дерзновенно представый; радуйся, верующих в Промысл Божий укрепляяй. Радуйся, люди, живот свой судьбе вверяющия, посрамляяй; радуйся, научаяй нас во всем упование наше на Бога возлагати. Радуйся, выну себе быти служителя Христова исповедуяй; радуйся, исповеданием тем веселие верным даруяй. Радуйся, соборища нечестивых исповеданием святым отлучивыйся; радуйся, грядущих мучений за нечестивых исповедание истиннаго Бога не устрашивыйся. Радуйся, истину единую Божественную возлюбивый; радуйся, лжи и отца ея, диавола, отвергийся. Радуйся, Христа своим упованием именуяй: радуйся, Его своею крепостию нарицаяй. Радуйся, Трифоне, ско-рый помощниче всем, с верою и любовию к тебе притекающим.
Кондак 9
Слышавше твое исповедание, ярости исполнишася нечестивии и прещаху ти ранами и мучением. Ты же, мучениче Трифоне, подъятие страданий за Христа веселием почитая, взывал еси немолчно Богу песнь: Аллилуиа.
Икос 9
Ветия многовещанный Аквилин, видя, яко ты не убоялся еси прещений лютых, яко овча кроткое явися, ища прельстити тя словесы ласкательными, но ничтоже успевая, паки в волка лютаго обращься, усугубляше прещения своя. Ты же тверд и непоколебим пребыл еси благодатию Божиею, воздвизая верных возглашати тебе сицевая Радуйся, прещений лютых не убоявыйся; радуйся, смерти телесной не устрашивыйся. Радуйся, душу свою за веру православную положити не отрекшийся; радуйся, разум совершенный в том положивый, да сохраниши веру истинную во Единаго Бога. Радуйся, не к земней, но к Небесней мудрости устремивыйся; радуйся, игемону, врагу твоему, спасения желавый. Радуйся, к познанию истиннаго Бога привести мучителя твоего тщавшийся; радуйся, проповедниче Христов сладко-гласный. Радуйся, христианине, Христом возлюбленный; радуйся, волею на страдания шедый. Радуйся, мучений тех за Христа, яко сокровища, хотевый; радуйся, во время мучений лютых Божественным светом осиянный. Радуйся, Трифоне, скорый помощниче всем, с верою и любовию к тебе притекающим.
Кондак 10
Услышав тя глаголавша, яко не исповедующих истинныя, православныя веры жребий есть огнь неугасимый, зело разгневася Аквилин и повеле тя, святый Трифоне, повесив, бити; ты же, в повелении сем услышав Господень глас, призывавший тя на страдальческий подвиг, возопил еси Богу: Аллилуиа.
Икос 10
Яко свеща огнем возгарается, тако душа твоя, святый Трифоне, возгореся любовию к возлюбившему тя Богу, и, услышав повеление игемона, еже на тя, сам совлекл еси ризы твоя и тело твое предал еси в руце мучителей, да сотворят вся, яже повеле игемон. Зряще таковую ревность твою по Бозе, вси вернии глаголаху: Радуйся, с веселием уготовавый себе к приятию ран за Христа; радуйся, риз своих совлекийся ради обнаженнаго некогда за грехи наши Искупителя. Радуйся, добровольно в руце мучителей себе предавый, Христу подражая; радуйся от них связанный и повешенный на мучение. Радуйся, приявый за Христа лютая ударения; радуйся, три часа терпе-вый нещадное биение. Радуйся, мучиму бывшу, ни единаго стенания и ни единаго гласа испустивый; радуйся, биения, узы, раны, опаления и иныя многоразличныя страдания претерпевый. Радуйся, в молчании приявый ударения, от них же ранами изъязвися тело твое; радуйся, страданием своим силу Божию прославивый. Радуйся, терпением своим мучителей посрамивый; радуйся, подвигом своим христиан возвеселивый. Радуйся, Трифоне, скорый помощниче всем, с верою и любовию к тебе притекающим.
Кондак 11
Видеша терпение и подвиг твой, святый Трифоне, еще же и адамантову крепость твою, и прославиша предстоящии людие Подвигоположника Христа Бога песнию: Аллилуиа.
Икос 11
Яко стену тверду и непоколебиму виде тя нечестивый судия, обаче не прослави Бога, даровавшаго тебе крепость сию, но паче тщашеся склонити тя и лестию и страхом смерти, да принесеши жертву бесовом. Ты же, святый мучениче, исповедав во ушию всех веру Христову, обличил еси безумие гонителей и показал еси мудрость тех, иже во Христа веруют; игемон же, измышляя на тя иная мучения, повеле тя со столпа сняти и, привязав к коню своему, влече за собою. Мы же потщимся прославити страдания твоя: Радуйся, уязвленный телом и за конем быстро влекомый, радуйся, хлад зимний претерпевый Радуйся, научаяй нас в скорбех земных ум свой к Богу устремляти; радуйся, наставляяй в мире сем хлад-ном согреватися любовию, яже к Богу. Радуйся, делом нам показуяй, како подобает ни во чтоже вменяти скоропреходящия на земле страдания; радуйся, любве и милосердия ко всем людем исполненный. Радуйся, ради любве тоя за враги своя молитвы Богу возносивый; радуйся паки в темницу вверженный и в заточении лютом томление, муку и болезни претерпевый. Радуйся, ясно являющии, яко лютейшая страдания земная ничтоже суть, аще к Богу прибегают людие и Бога ради терпят скорби и раны; радуйся, на усекновение главы твоея радостно шедый и пред усекновением тем в руце Бога твоего, Егоже ради вся лютая подъял еси, душу свою святую предавый. Радуйся, прежде усекновения моливыйся о всяком, иже воспоминати тя и в память твою святыя жертвы приносити будет, да услышит его Господь и всякое прошение его исполнит; радуйся, по успении твоем в видении повелевый погребсти тя во отечествии твоем, научая тем и нас свое отечество любити. Радуйся, Трифоне, скорый помощниче всем, с верою и любовию к тебе притекающим.
Кондак 12
Не токмо на земли, святый мучениче, был еси помощник и заступник всем, твоея помощи требующим, но и по смерти не престаеши избавляти от бед к тебе с верою и любовию притекающих, якоже избавил еси царского гнева болярина Трифона, егда внезапу явился ему на коне и дал еси ему отлетевшаго царскаго сокола. Оный же Трифон сокольник на месте сем, идеже ему от тебе помощь явися, во благодарение тебе за избавление свое воздвиже святый храм во имя твое, мучениче Трифоне. Мы же благодеяния от тебе бывшая воспоминающе, возносим благодарственную Богу песнь: Аллилуиа. Икос 12

Поюще твоя многоразличная чудеса, твою дивную и скорую помощь, яко никогоже усердно прибегающаго к тебе с верою, любовию и упованием никогда же отринул еси, но всех к тебе притекающих и пред святою иконою твоею смиренно молящихся от внезапных бед и скорбей избавляеши, прочее время живота их во благо устрояеши, недузи врачуеши, печали утоляеши и комуждо в бедах и скорбех к тебе припадающему помощь и ослабу даруеши, благодарне восхваляем тя сице: Радуйся, наша моления и прошения приемляй, радуйся, за ны пред Престолом Божиим молящийся. Радуйся, от Бога милости нам непрестанно просящий; радуйся от нечаянных бед и зол непреложное наше избавление. Радуйся, от бед и напастей, движимых на ны грех ради наших, скорое прибежище, радуйся многия слезы от скорби проливаемыя, изсушивый. Радуйся, многия печали утоливый; радуйся, яко никтоже припадый к святей иконе твоей тощь от нея отъиде. Радуйся, всякаго притекающаго к тебе под кров свой и заступление приемляй; радуйся, здравия требующим скорое исцеление. Радуйся, оставленных врачами и ради неисцельных и тяжких недуг своих чающих себе смерти, скорое и безмездное врачевание, радуйся, и ныне, якоже и древле, живу ти сущу, неизсякаемый источниче неизчетных и многообразных чудотворений. Радуйся, Трифоне, скорый помощниче всем, с верою и любовию к тебе притекающим.
Кондак 13
О святый мучениче Трифоне! Приими сие малое, обаче от любящих и благодарных сердец приносимое тебе наше моление, вознеси ко Господу Богу теплыя молитвы твоя за ны, недостойныя: болящия исцели, печальныя утеши, заблуждшия вразуми, бедствующим помози, и вся нам потребная для здравия телеснаго и спасения душевнаго у Бога Щедродавца испроси, наипаче же избави нас от лукавых бесов, да памятуя выну твоя дивная о нас заступления, прославим Бога, даровавшаго нам таковаго молитвенника, целителя и чудотворца, воспевающе песнь: Аллилуиа.
(Этот кондак читается трижды)Икос 1
Образу благочестия родителей твоих подражая, христианския нравы от лет малых приял еси, святый мучениче, и мал сый леты, стар же разумом, воистину христианин совершен явился еси. Мы же, воспоминающе добродетельное житие твое, восхваляем тя сице: Радуйся, добронравных родителей благочестивый сыне; радуйся, великое их утешение. Радуйся, Ангела твоего Хранителя непрестанное веселие; радуйся, от юности твоея всего себе Богу предавый. Радуйся, от юности Христа возлюбивый; радуйся, от малых лет благодать Божию обильно стяжавый. Радуйся, душу свою непорочну явивый; радуйся, себе самаго в храм Духа Святаго уготовавый. Радуйся, отроком образ жития святаго показавый; радуйся, благочестием твоим верныя возвеселяяй. Радуйся, от малых лет за вся сия Богом возлюбленный. Радуйся, Трифоне, скорый помощниче всем, с верою и любовию к тебе притекающим.
Кондак 1
Избранный от Бога и к лику святых сопричтенный, святый мучениче Трифоне! Молися о нас, грешных, Владыце Христу и помогай нам побеждати мир, плоть и диавола, многообразно воюющия на ны, якоже победил еси их благодатию и силою возлюбленнаго тобою Христа, да, избавльшеся от врагов наших видимых и невидимых, благодарственно воззовем ти: Радуйся, Трифоне, скорый помощниче всем, с верою и любовию к тебе притекающим!

Тропарь мученика Трифона глас 4 Мученик Твой, Господи, Трифон,/ во страдании своем венец прият нетленный от Тебе, Бога нашего,/ имеяй бо крепость Твою,/ мучителей низложи,/ сокруши и демонов немощныя дерзости./ Того молитвами// спаси души наша.

Ин тропарь мученика Трифона глас 4 Пищи Божественныя, треблаженне,/наслаждаяся на Небесех неоскудно,/ славящих песньми память твою покрый/и сохрани от всякия нужды,/ отженй вредящих нивам животных,/ да тебе от любве вопием всегда:/ радуйся, Трифоне, мучеников укрепление.

Кондак мученика Трифона глас 8 Тройческою твердостию/ многобожие разрушил еси от конец, всеславне,/ честен во Христе быв, и, победив мучители во Христе Спасителе,/ венец приял еси мученичества твоего/ и дарования Божественных исцелений,// яко непобедим.

Кондак, глас 6. Со Отцем Слово Сый невидимо,/ ныне убо видим есть плотию:/ неизреченно от Девы родися/ и на руку старчу дается святителю./ Поклонимся Тому/ истинному Богу нашему.

Молитва первая

О, святый мучениче Христов Трифоне, скорый помощниче всем, к тебе прибегающим и молящимся пред святым твоим образом скоропослушный предстателю! Услыши убо ныне и на всякий час моление нас, недостойных рабов твоих, почитающих святую память твою. Ты убо, угодниче Христов, сам обещался еси прежде исхода твоего от жития сего тленнаго молитися за ны ко Господу и испросил еси у Него дар сей: аще кто в коей-либо нужде и печали своей призывати начнет святое имя твое, той да избавлен будет от всякаго прилога злаго. И якоже ты иногда дщерь цареву в Риме граде от диавола мучиму исцелил еси, сице и нас от лютых его козней сохрани во вся дни живота нашего, наипаче же в день страшный последняго нашего, издыхания предстательствуй о нас, егда темнии зраки лукавых бесов окружати и устрашати нас начнут. Буди нам тогда помощник и скорый прогонитель лукавых бесов, и к Царствию Небесному предводитель, идеже ты ныне предстоиши с ликом святых у Престола Божия, моли Господа, да сподобит и нас причастниками быти присносущнаго веселия и радости, да с тобою купно удостоимся славити Отца и Сына и Святаго Утешителя Духа во веки. Аминь.

Молитва вторая

О святый мучениче Христов Трифоне, услыши ныне и на всякий час моление нас, раб Божиих (имена), и предстательствуй о нас пред Господем. Ты некогда дщерь цареву, во граде Риме от диавола мучиму, исцелил еси: сице и нас от лютых его козней сохрани во вся дни жития нашего, наипаче же в день последняго нашего издыхания предстательствуй о нас. Моли Господа, да сподобит и нас причастники быти присносущнаго веселия и радости, да с тобою купно удостоимся славити Отца и Сына и Святаго Утешителя Духа во веки веков.

Источник:

Текст: Православная библиотека

https://www.pravoslavnaya-biblioteka.ru/akafistnik/243.html

Изображение: Икона мастерской Е. Ильинской

Молитва 2‑я**

О, святы́й му́чениче Христо́в Три́фоне, услы́ши ны́не и на вся́кий час моле́ние нас, раб Бо́жиих (имена), и предста́тельствуй о нас пред Го́сподем. Ты не́когда дщерь царе́ву, во гра́де Ри́ме от диа́вола му́чиму, исцели́л еси́: си́це и нас от лю́тых его́ ко́зней сохрани́ во вся дни жития́ на́шего, наипа́че же в день после́дняго на́шего издыха́ния предста́тельствуй о нас. Моли́ Го́спода, да сподо́бит и нас прича́стники бы́ти присносу́щнаго весе́лия и ра́дости, да с тобо́ю ку́пно удосто́имся сла́вити Отца́ и Сы́на и Свята́го Уте́шителя Ду́ха во ве́ки веко́в. Ами́нь.

Перевод: О, святой мученик Христов Трифон, услышь ныне и на всякий час моление нас, рабов Божиих (имена), и ходатайствуй о нас пред Господом. Ты некогда царскую дочь, во граде Риме мучимую диаволом, исцелил: так и нас от лютых его козней сохрани во все дни жизни нашей, особенно же в день последнего нашего вздоха ходатайствуй о нас. Моли Господа, да сподобит и нас стать причастниками вечного веселия и радости, дабы мы с тобою вместе удостоились славить Отца и Сына и Святого Утешителя Духа во веки веков.

Что такое молебен

Молебен – одна из любимых треб у прихожан многих храмов. Болеет кто – спешит заказать молебен о здравии, отправляется в путешествие – тут же служат молебен о путешествующих, предпринимает кто важное дело – как же обойтись без молебна перед началом всякого доброго дела? А если исполнилось наше желание, успешно завершено трудное дело – мы спешим заказать Благодарственный молебен Господу. Служат общенародные молебны и в особо важные моменты: перед началом учебного года, на Новый год и т.д. Как правило, в каждом храме раз в неделю служатся водосвятные молебны, после которого прихожане могут набрать святой воды.
Когда у человека есть особая, личная нужда в чем-то, например, материальные трудности, проблемы с жильем, работой и деньгами, можно заказать просительный молебен Богу, Богородице или святому. К Божией Матери обращаются через Ее чудотворные иконы. По традиции, обращаются и к тем святым, кто помогал людям и прославился чудесами и исцелениями. Так, к святому мученику Трифону обращаются с молитвами о работе и избавлении от материальных трудностей. Просительный молебен может заказать любой верующий в любом храме.