Канон прп. Андрея Критского в среду первой седмицы Великого Поста
Песнь 1, глас 6
Ирмос: Помощник и Покровитель бысть мне во спасение, Сей мой Бог, и прославлю Его, Бог отца моего, и вознесу Его, славно бо прославися.
Запев: Помилуй мя, Боже, помилуй мя.
От юности Христе заповеди Твоя преступих, всестрастно небрегий, унынием преидох житие. Темже зову Ти Спасе, поне на конец спаси мя.
Повержена мя Спасе, пред враты Твоими, поне на старость не отрини мене во ад тща, но прежде конца, яко Человеколюбец, даждь ми прегрешений оставление.
Богатство мое, Спасе, изнурив в блуде, пуст есмь плодов благочестивых, алчен же зову: Отче щедрот, предварив Ты мя ущедри.
В разбойники впадый аз есмь помышленьми моими, весь от них уязвихся ныне, и исполнихся ран, но Сам ми представ, Христе Спасе исцели.
Священник мя предвидев мимо иде, и левит видев в лютых, нага презре, но из Марии возсиявый Иисусе, Ты представ ущедри мя.
Преподобная мати Марие, моли Бога о нас.
Ты ми даждь светозарную благодать. от Божественнаго свыше Промышления, избежати страстей омрачения, и пети усердно твоего Марие жития, красная исправления.
Слава,
Троичен: Пресущная Троице, во Единице Покланяемая, возми бремя от мене тяжкое греховное, и яко благоутробна, даждь ми слезы умиления.
И ныне,
Богородичен: Богородице, Надежде и Предстательство Тебе поющих, возми бремя от мене тяжкое греховное, и яко Владычица Чистая, кающася приими мя.
Песнь 2
Ирмос: Вонми небо, и возглаголю, и воспою Христа, от Девы плотию пришедшаго.
Поползохся яко Давид блудно, и осквернихся, но омый и мене Спасе, слезами.
Ни слез, ниже покаяния имам, ниже умиления. Сам ми сия Спасе, яко Бог даруй.
Погубих первозданную доброту и благолепие мое, и ныне лежу наг и стыждуся.
Дверь Твою не затвори мне тогда, Господи, Господи, но отверзи ми сию кающемуся Тебе.
Внуши воздыхания души моея, и очию моею приими капли Спасе, и спаси мя.
Человеколюбче хотяй всем спастися, Ты воззови мя, и приими яко благ кающагося.
Запев: Пресвятая Богородице, спаси нас.
Пречистая Богородице Дево, едина всепетая, моли прилежно во еже спастися нам.
Ирмос: Видите видите, яко Аз есмь Бог, манну одождивый, и воду из камене источивый древле в пустыни людем Моим, десницею единою, и крепостию Моею.
Видите видите, яко Аз есмь Бог, внушай душе моя, Господа вопиюща, и удалися прежняго греха, и бойся яко неумытнаго, и яко Судии и Бога.
Кому уподобилася еси многогрешная душе? Токмо первому Каину, и Ламеху оному, каменовавшая тело злодействы, и убившая ум безсловесными стремленьми.
Вся прежде закона претекши, о душе, Сифу не уподобилася еси, ни Еноса подражала еси, ни Еноха преложением, ни Ноя, но явилася еси убога праведных жизни.
Едина отверзла еси хляби гнева Бога твоего душе моя, и потопила еси всю, якоже землю плоть, и деяния и житие, и пребыла еси вне спасительнаго ковчега.
Запев: Преподобная мати Марие, моли Бога о нас.
Всем усердием и любовию притекла еси Христу, первый греха путь отвращши, и в пустынях непроходимых питающися, и Того чисте совершающи Божественныя заповеди.
Слава,
Троичен: Безначальная, Несозданная Троице, Нераздельная Единице, кающася мя приими, согрешивша спаси, Твое есмь создание, не презри, но пощади, и избави мя огненнаго осуждения.
И ныне,
Богородичен: Пречистая Владычице, Богородительнице, Надеждо к Тебе притекающих, и пристанище сущих в бури, Милостиваго и Создателя и Сына Твоего умилостиви и мне молитвами Твоими.
Песнь 3
Ирмос: Утверди Господи, на камени заповедей Твоих, подвигшееся сердце мое, яко Един Свят еси и Господь.
Благословения Симова не наследовала еси душе окаянная, ни пространное одержание, якоже Иафеф, имела еси на земли оставления.
От земли Харран, изыди от греха душе моя, гряди в землю точащую присноживотное нетление, еже Авраам наследствова.
Авраама слышала еси душе моя, древле оставльша землю отечества, и бывша пришельца сего произволению подражай.
У дуба Мамврийскаго учредив патриарх Ангелы, наследствова по старости обетования ловитву.
Исаака, окаянная душе моя, разумевши новую жертву, тайно всесожженную Господеви, подражай его произволению.
Исмаила слышала еси, трезвися душе моя, изгнана яко рабынино отрождение, виждь; да не како подобно что постраждеши ласкосердствующи.
Запев: Преподобная мати Марие, моли Бога о нас.
Содержимь есмь бурею и треволнением согрешений, но сама мя мати ныне спаси, и к пристанищу Божественнаго покаяния возведи.
Запев: Преподобная мати Марие, моли Бога о нас.
Рабское моление и ныне преподобная принесши, ко благоутробней молитвами твоими Богородице, отверзи ми Божественныя входы.
Слава,
Троичен: Троице Простая, Несозданная, Безначальное Естество, в Троице певаемая Ипостасей, спаси ны, верою покланяющыяся державе Твоей.
И ныне,
Богородичен: От Отца безлетна Сына, в лето, Богородительнице, неискусомужно родила еси, странное чудо, пребывши Дева доящи.
Песнь 4
Ирмос: Услыша пророк пришествие Твое Господи, и убояся, яко хощеши от Девы родитися, и человеком явитися, и глаголаше: услышах слух Твой, и убояхся, слава силе Твоей Господи.
Тело осквернися, дух окаляся, весь острупихся, но яко врач Христе, обоя покаянием моим уврачуй, омый, очисти, покажи Спасе мой паче снега чистейша.
Тело Твое и кровь Распинаемый о всех положил еси Слове: тело убо, да мя обновиши, кровь, да омыеши мя. Дух же предал еси, да мя приведеши Христе Твоему Родителю.
Соделал еси спасение посреде земли Щедре, да спасемся. Волею на древе распялся еси, Едем затворенный отверзеся, горняя и дольняя тварь, языцы вси спасени покланяются Тебе.
Да будет ми купель, кровь из ребр Твоих, вкупе и питие источившее воду оставления, да обоюду очищаюся, помазуяся, и пия, яко помазание и питие Слове, животочная Твоя словеса.
Чашу Церковь стяжа, ребра Твоя живоносная, из нихже сугубыя нам источи токи, оставления и разума, во образ Древняго и Новаго, двоих вкупе Заветов, Спасе наш.
Наг есмь чертога, наг есмь и брака, купно и вечери; светильник угасе, яко безъелейный, чертог заключися, мне спящу, вечеря снедеся, аз же по руку и ногу связан, вон низвержен есмь.
Слава,
Троичен: Нераздельное существом, неслитное Лицы, богословлю Тя, Троическое Едино Божество, яко Единоцарственное и Сопрестольное, вопию Ти песнь великую, в вышних трегубо песнословимую.
И ныне,
Богородичен: И раждаеши, и девствуеши, и пребываеши обоюду естеством Дева, Рождейся обновляет законы естества, утроба же раждает нераждающая. Бог идеже хощет, побеждается естества чин: творит бо елика хощет.
Песнь 5
Ирмос: От нощи утренююща, Человеколюбче, просвети молюся, и настави и мене на повеления Твоя, и научи мя Спасе, творити волю Твою.
Яко тяжкий нравом, фараону горькому бых Владыко, Ианни и Иамври, душею и телом, и погружен умом, но помози ми.
Калу примесихся окаянный умом, омый мя Владыко банею моих слез, молю Тя, плоти моея одежду убелив яко снег.
Аще испытаю моя дела Спасе, всякаго человека превозшедша грехами себе зрю, яко разумом мудрствуяй согреших, не неведением.
Пощади, пощади Господи, создание Твое, согреших, ослаби ми, яко естеством чистый Сам сый Един, и ин разве Тебе никтоже есть кроме скверны.
Мене ради Бог сый, вообразился еси в мя, показал еси чудеса, исцелив прокаженныя, и разслабленнаго стягнув, кровоточивыя ток уставил еси Спасе, прикосновением риз.
Запев: Преподобная мати Марие, моли Бога о нас.
Струи Иорданския прешедши, обрела еси покой безболезненный, плоти сласти избежавши, еяже и нас изми твоими молитвами, преподобная.
Слава,
Троичен: Тя Троице славим, Единаго Бога: Свят, Свят, Свят еси Отче, Сыне и Душе, Простое Существо, Единице присно покланяемая.
И ныне,
Богородичен: Из Тебе облечеся в мое смешение, нетленная, безмужная Мати Дево, Бог создавый веки, и соедини Себе человеческое естество.
Песнь 6
Ирмос: Возопих всем сердцем моим к щедрому Богу, и услыша мя от ада преисподняго, и возведе от тли живот мой.
Востани и побори, яко Иисус Амалика, плотския страсти, и гаваониты, лестныя помыслы, присно побеждающи.
Преиди времене текущее естество, яко прежде ковчег, и земли оныя буди во одержании обетования душе, Бог повелевает.
Яко спасл еси Петра, возопивша спаси, предварив мя Спасе от зверя избави, простер Твою руку, и возведи из глубины греховныя.
Пристанище Тя вем утишное, Владыко, Владыко Христе, но от незаходимых глубин греха, и отчаяния мя предварив избави.
Слава,
Троичен: Троица есмь Проста, Нераздельна, Раздельна Личне, и Единица есмь естеством соединена, Отец глаголет, и Сын, и Божественный Дух.
И ныне,
Богородичен: Утроба Твоя Бога нам роди, воображена по нам, Егоже, яко Создателя всех, моли, Богородице, да молитвами Твоими оправдимся.
Господи, помилуй (трижды).
Слава Отцу, и Сыну, и Святому Духу. И ныне, и присно, и во веки веков. Аминь.
Кондак, глас 6:
Душе моя, душе моя, востани, что спиши? Конец приближается, и имаши смутитися, воспряни убо, да пощадит тя Христос Бог, везде сый, и вся исполняяй.
Песнь 7
Ирмос: Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже заповедал еси нам; но не предаждь нас до конца, отцев Боже.
Манассиева собрала еси согрешения изволением, поставльши яко мерзости страсти, и умноживши душе негодование, но того покаянию ревнующи тепле, стяжи умиление.
Ахаавовым поревновала еси сквернам, душе моя, увы мне, была еси плотских скверн пребывалище, и сосуд срамлен страстей; но из глубины твоея воздохни, и глаголи Богу грехи твоя.
Заключися тебе небо душе, и глад Божий постиже тя, егда Илии Фесвитянина якоже Ахаав не покорися словесем иногда; но Сараффии уподобився, напитай пророчу душу.
Попали Илиа иногда дващи пятьдесят Иезавелиных, егда студныя пророки погуби, во обличение Ахаавово, но бегай подражания двою душе, и укрепляйся.
Слава,
Троичен: Троице Простая, Нераздельная, Единосущная, и Естество Едино, Светове и Свет, и Свята Три, и Едино Свято поется Бог Троица; но воспой, прослави Живот и Животы, душе всех Бога.
И ныне,
Богородичен: Поем Тя, благословим Тя, покланяемся Ти, Богородительнице, яко Нераздельныя Троицы, породила еси Единаго Христа Бога, и Сама отверзла еси нам сущым на земли небесная.
Песнь 8
Ирмос: Егоже воинства небесная славят, и трепещут Херувими и Серафими, всяко дыхание и тварь, пойте, благословите, и превозносите во вся веки.
Правосуде Спасе помилуй, и избави мя огня, и прещения, еже имам на суде праведно претерпети, ослаби ми прежде конца, добродетелию и покаянием.
Яко разбойник вопию Ти: помяни мя, яко Петр плачу горце, ослаби ми Спасе, зову яко мытарь, слезю яко блудница, приими мое рыдание, якоже иногда хананеино.
Гноение, Спасе, исцели смиренныя моея души, Едине Врачу, пластырь мне наложи, и елей и вино, дела покаяния, умиление со слезами.
Хананею и аз подражая, помилуй мя, вопию, Сыне Давидов; касаюся края ризы, яко кровоточивая; плачу, яко Марфа и Мариа над Лазарем.
Слава,
Троичен: Безначальне Отче, Сыне Собезначальне, Утешителю Благий, Душе Правый, Слова Божия Родителю, Отца Безначальна Слове, Душе Живый и Зиждяй, Троице Единице помилуй мя.
И ныне,
Богородичен: Яко от оброщения червленицы, Пречистая, умная багряница Еммануилева, внутрь во чреве Твоем плоть исткася, темже Богородицу воистинну Тя почитаем.
Песнь 9
Ирмос: Безсеменнаго зачатия рождество несказанное, Матере безмужныя нетленен Плод, Божие бо рождение обновляет естества; темже Тя вси роди яко Богоневестную Матерь, православно величаем.
Недуги исцеляя, нищым благовествоваше, Христос Слово, вредныя уврачева, с мытари ядяше, со грешники беседоваше, Иаировы дщере душу предумершую возврати осязанием руки.
Мытарь спасашеся, и блудница целомудрствоваше, и фарисей, хваляся осуждашеся. Ов убо, очисти мя, ова же, помилуй мя, сей же величашеся вопия: Боже, благодарю Тя, и прочыя безумныя глаголы.
Закхей мытарь бе, но обаче спасашеся, и фарисей Симон соблажняшеся, и блудница приимаше оставительная разрешения, от Имущаго крепость оставляти грехи, юже душе потщися подражати.
Блуднице, о окаянная душе моя, не поревновала еси, яже приимши мира алавастр, со слезами мазаше нозе Спасове, отре же власы древних согрешений рукописание раздирающаго ея.
Грады, имже даде Христос благовестие, душе моя, уведала еси, како прокляти быша; убойся указания, да не будеши якоже оны, ихже содомляном Владыка уподобив, даже до ада осуди.
Да не горшая о душе моя, явишися отчаянием, хананеи веру слышавшая, еяже дщи словом Божиим исцелися; Сыне Давидов, спаси и мене, воззови из глубины сердца, якоже она Христу.
Слава,
Троичен: Отца прославим, Сына превознесем, Божественному Духу верно поклонимся, Троице Нераздельней, Единице по существу, яко Свету и Светом, и Животу и Животом, животворящему и просвещающему концы.
И ныне,
Богородичен: Град Твой сохраняй, Богородительнице Пречистая, в Тебе бо сей верно царствуяй, в Тебе и утверждается, и Тобою побеждаяй, побеждает всякое искушение, и пленяет ратники, и проходит послушание.
Запев: Преподобне отче Андрее, моли Бога о нас.
Андрее честный, и отче треблаженнейший, пастырю Критский, не престай моляся, о воспевающих тя, да избавимся вси гнева, и скорби, и тления, и прегрешений безмерных, чтущии твою память верно.
Песнь 5
Яко тяжкий нравом, фараону горькому бых, Владыко, Ианни и Иамври, душею и телом, и погружен умом, но помози ми.
Ианни и Иамври — имена египетских жрецов, которые противились чудесам Божиим, явленным через пророка Моисея, но не смогли с помощью своих богов сотворить подобных чудес (Исх. 7:11; 2 Тим. 3:8). В книгах Ветхого Завета имена не названы, не говорится и о количестве жрецов. Больше сведений о них сохранило древнее иудейское предание, которое отражено во 2-м послании апостола Павла к Тимофею 3:8.
Песнь 6
Востани и побори, яко Иисус Амалика, плотския страсти, и гаваониты, лестныя помыслы, присно побеждающи.
Иисус Навин — предводитель израильтян на пути в землю обетованную во время исхода из Египта. После смерти пророка Моисея возглавил священную войну израильтян против нечестивых языческих племён, населявших Палестину.
Амалик, амаликитяне — народность, с древних времён занимавшая земли между Синайским полуостровом и юго-западной частью Палестины, до границ Египта и Аравии. Амаликитяне напали на израильтян во время их исхода из Египта. Между ними произошло сражение, в котором израильтянам помогла победить молитва пророка Моисея. Когда Моисей поднимал руки в молитве, евреи побеждали, а когда его руки (а вместе с ними и молитва) ослабевали, верх брали амаликитяне. Воздетые крестообразно руки Моисея являются прообразом побеждающего Креста Господня (Исх. 17:8-16). Последнее упоминание об амаликитянах в Ветхом Завете встречается во 2-й книге Царств (8 глава), где рассказывается, что земли и золото амаликитян завоевал царь Давид.
Гаваониты — жители палестинского языческого города Гаваона, который Господь повелел уничтожить израильтянам под предводительством Иисуса Навина за беззакония. Узнав об этом грозном повелении, хитрые гаваонитяне пришли в израильский стан под видом нищих странников из далёких земель и заставили израильтян поклясться Богом, что те их не тронут. Когда евреи узнали, что на самом деле эти люди — жители Гаваона, то уже не могли причинить им вреда, так как дали клятву. Израильтяне оставили гаваонитян в стане в качестве слуг — заставили их носить воду и колоть дрова.
Преиди, времене текущее естество, яко прежде ковчег, и земли оныя буди во одержании обетования, душе, Бог повелевает.
Здесь вспоминается чудесный переход израильтянами Иордана как по суху при вступлении в землю обетованную. После того, как священники внесли ковчег завета на середину реки, её воды остановились.
Яко спасл еси Петра, возопивша, спаси, предварив мя, Спасе, от зверя избави, простер Твою руку, и возведи из глубины греховныя.
Пётр — ученик Христов, один из 12 апостолов. Когда Господь пришёл к ученикам, бывшим в лодке, по воде, Пётр пошёл по воде навстречу Иисусу, но, испугавшись, начал тонуть. Господь простёр руку и спас Петра (Мф. 14:23-32).
Песнь 8
Яко разбойник, вопию Ти: помяни мя; яко Петр, плачу горце: ослаби ми, Спасе; зову, яко мытарь, слезю, яко блудница; приими мое рыдание, якоже иногда хананеино.
Пётр — апостол Пётр. После того, как трижды отрёкся от Христа (Мф.26:69-75; Мк. 14:66-72; Лк. 22:55-62; Ин. 18:15-18, 18:25-27), всю оставшуюся жизнь оплакивал свой поступок.
Хананею и аз подражая, помилуй мя, вопию, Сыне Давидов; касаюся края ризы, яко кровоточивая, плачу, яко Марфа и Мария над Лазарем.
Хананея — сирофиникиянка, которая, несмотря на то, что была язычницей, умолила Христа исцелить её дочь (Мк. 7:24-30).
Сын Давидов — так называли Христа иудеи потому, что по человечеству Он был потомком царя Давида, о чём в ветхозаветное время предсказывали пророки.
Марфа и Мария — сёстры Лазаря в Вифании, в доме которого останавливался Христос. В Евангелии от Луки (Лк. 10:38-42) Господь укоряет Марфу за то, что она заботится о многом, но не о главном — наставлении в Слове Божием.
Лазарь — друг Христов, над которым совершилось одно из самых славных чудес Господа Иисуса Христа. Господь воскресил Лазаря, скончавшегося от внезапной болезни, на четвёртый день после смерти, когда Марфа и Мария горько оплакивали его и положили во гроб, откуда уже исходил смрад разлагающегося тела. Воскресение Лазаря, свидетелями которого стало множество народа, укрепило веру простых израильтян в Иисуса как в посланного Мессию, а апостолов после распятия Христа утвердило в надежде на Его воскресение. Это событие послужило поводом к тому, что на следующий день тысячи людей приветствовали Спасителя с пальмовыми ветвями во время Его входа в Иерусалим, а книжники и фарисеи, видя, сколько народа уверовало в Него, окончательно решили составить заговор против Христа (Ин. 11:1-12:11). Память праведного Лазаря празднуется в субботу перед праздником Входа Господня в Иерусалим («лазарева суббота»). После своего воскресения праведный Лазарь прожил ещё тридцать лет и был епископом в городе Китий на острове Крит.
